Qańtar oqiǵasyna qatysty qylmys jasady degen kúdikpen 751 adam tergeý izoliatorlarynda otyr. Olardyń jai-kúiin kún saiyn prokýrorlar men quqyq qorǵaý uiymdary tekseredi. Bul týraly QR Bas prokýratýranyń Qylmystyq qýdalaý qyzmeti bastyǵynyń orynbasary Eldos Qilymjanov aitty, dep habarlaidy QazAqparat.
«Bas prokýratýra turaqty túrde qamaýda otyrǵan adamdardyń jai-kúii boiynsha tekserý júrgizedi. Qazirgi ýaqytta tergeý izoliatorlarynda 751 adam otyr. Kúdiktiler ustalatyn úi-jailardy kún saiyn prokýrorlar ǵana emes, quqyq qorǵaý uiymdary da tekseredi. Adam quqyqtary jónindegi ýákilmen, úilestirý keńesiniń múshelerimen jáne ulttyq aldyn alý tetiginiń qatysýshylarymen birlesip barlyq óńirlerde tergeý izoliatorynda, ýaqytsha ustaý izoliatorynda jáne arnaiy qabyldaý oryndarynda 118 kezdesý júrgizildi. Ustaý jaǵdailaryna sonyń ishinde sanitarlyq normalarǵa, tamaqtanýǵa, dári-dármekpen qamtýǵa jáne basqalaryna erekshe nazar aýdaryldy», - dedi Qilymjanov Ortalyq kommýnikatsiialar qyzmetinde ótken brifingte.
