Foto: Pexels.com
Qazaqstanda óziniń bank kartasyn, shotyn nemese derbes derekterin úshinshi tulǵalarǵa paidalanýǵa bergenderge qatań jaýapkershilik qarastyrylmaq. Bas prokýratýra mundai áreketter internet-alaiaqtyq pen esirtki ainalymyna jol ashatynyn eskertip otyr, dep habarlaidy Ult.kz.
Memleket basshysynyń aitýynsha, búginde 50 myńnan astam qazaqstandyq zańsyz onlain áreketterge tartylǵan. Tergeý barysynda qylmystyq shemalarǵa kómektesken 6 myńnan astam dropperdiń (qarjylyq deldal) jeke basy anyqtalǵan.
Qazir Parlament Senatynda qaralyp jatqan zań jobasynda Qylmystyq kodekske jańa 232-1-bap engiziledi. Ol boiynsha óziniń tólem quraldaryn bóten bireýge zańsyz ári syiaqy alý maqsatynda bergen azamattarǵa 7 jylǵa deiin bas bostandyǵynan aiyrý jazasy qarastyrylǵan.
Dropper bolýdyń saldary:
-
Bank shottarynyń buǵattalýy;
-
Qarjylyq qyzmetke tyiym salý;
-
Qylmystyq jaýapkershilikke tartylý.
Bul talaptar shetel azamattaryna da qatysty — eger olar óz shottaryn Qazaqstandaǵy zańsyz áreketter úshin paidalanýǵa berse, dál sol jaýapkershilik qaralady.
Alaida, eger adam mundai shemaǵa tartylǵanyn túsinip, óz erkimen ýákiletti organdarǵa habarlasa jáne tergeýge kómek berse, qylmystyq jaýapkershilikten bosatylýy múmkin.
Bas prokýratýra azamattardy alaiaqtardyń quralyna ainalmaýǵa, al buryn kartasyn bergenderge – bankke júginip, shottaryn buǵattaýǵa keńes beredi.
