Qazaqstan musylmandary Dini basqarmasynyń tóraǵasy, Bas múfti Serikbai qajy Oraz Qazaqstan Dintanýshylarynyń HI forýmynda eldegi dini ahýal týraly áńgimeledi, – dep habarlaidy «Ult aqparat».
«Ashyǵyn aitqanda, din qyzmetkerleriniń qoǵam aldyndaǵy jaýapkershiligi arheologtardyń jumys baǵytyna uqsaityn amanaty úlken sala. Názik salanyń mamandary, iaǵni arheologtar men imamdar jerdi belden qazyp, jumysty óndirip jasaiyn dese, topyraq astyndaǵy tarihi jádigerlerdi búldirip ne syndyryp alatyny aqiqat. Rýhani murany arshyp alýǵa sabyr men tózim, uqyptylyq pen tiianaqtylyq qajet. Adam sanasyn ońaltý da osyndai: jyldar boiy jinaqtalǵan túisiktegi teris dini túsinikti kúnder men ailarmen túzete almaisyń. Imamdarmen jii bolatyn jeke kezdesýimizde de destrýktivti aǵymdaǵy azamattara túsindirý jumystarynda terapevttiń tásilin qoldanyńdar dep, baǵyt-baǵdar beretinimiz sondyqtan» dedi Bas múfti Qazaqstan Dintanýshylarynyń HI forýmynda.
Serikbai qajy Orazdyń aitýynsha, rasynda da, sana túzelse adam túzeledi.
«Dini saladaǵy birneshe jyldan eńbek ótili men tájiribemizdi eskere otyryp, ońaltý jumystarynda tiimdi tásildiń biri de biregeii – onyń qýanyshy men qiyndyq sátterinde birge bolý der edim. Suhbattasý tásili dostyqqa jeteleidi. Muny psihologiia ǵylymy suhbattasýshynyń jaǵdaiyna ený degen uǵymmen túsindiredi. Al Islam dini budan da biik kórkem amalǵa úndeidi. Ardaqty paiǵambarymyz Muhammed (s.ǵ.s) «Ózine qalaǵan igi jaqsylyqty ózge adamǵa qalamaiynsha shynaiy imanmen qaýysha almaidy» deidi. Oblysta ókil imam bolyp júrgende de destrýktivti aǵymǵa aldanǵan adamdarǵa moraldyq hám materialdyq turǵyda júieli túrde kómek kórsetip keldik. Janashyrlyq sezim naqty amalmen úilespese árine, ol naqty nátije bermeidi. Imamdardyń tileýtestigin tanyǵan sol azamattar qatarymyzǵa qosylyp, radikaldy raiynan qaitty. Osylaisha, suhbattastyq dostyqqa, al dostyq qatynas baýyrmaldyqqa ulasady» dedi ol.
Bas múftidiń aitýynsha, búgin de bilim men tájiribesi tolysqan imamdardyń da osy baǵyttaǵy jumystarynyń arqasynda elimizde jyl saiyn 500-den astam azamat jat aǵymnan bas tartyp, dástúrli dinimizben qaýyshyp keledi.
