Asa qamqor, erekshe Meiirimdi Allanyń atymen bastaimyn!
Qurmetti musylman baýyrlar, otandastar!
Barshamyzdy qasietti ramazan aiyna aman-esen jetkizgen Alla Taǵalaǵa sansyz shúkirler bolsyn. Sizderdi kúlli musylman qaýymy asyǵa kútken múbárak ramazan aiynyń kelýimen quttyqtaimyn!
Ramazan – on eki aidyń sultany, berekeli de keshirimi mol ai. Qasietti aida adam balasy kóbirek jaqsylyq jasap, izgi amaldardy atqarýǵa tyrysady. Oraza pendeni taqýalyqqa tárbieleidi.
Ramazan – Allanyń meiirimi tógilip, jumaqtyń esigi aiqara ashylatyn, imandy kúsheitýge múmkindik berilgen berekeli ai. Bul – Jaratýshy Iemizdiń uly syiy ári nyǵmeti.
Saýaptar eselenip jazylatyn aida jasalǵan qaiyrly istiń qaitarymy adam balasy úshin qupiia-syr. Tipti, aýyz bekitýshige beriletin syi men saýap, qurmet pen marapat paiǵambarlar men perishtelerge de belgisiz.
Qudsi hadiste Alla Taǵala: «Oraza – tek Men úshin. Onyń syiyn (saýabyn) Ózim ǵana beremin...» – dep orazanyń qadiri men qasietin, máni men mańyzyn baiandaǵan.
Sharapaty men shapaǵaty mol aida saýap jinaýǵa, ishki dúniemizdi tazartýǵa, Jaratýshynyń razylyǵyna bólenýge asyǵaiyq, aǵaiyn! Óitkeni, musylmannyń osy aida ustaǵan orazasy, qosymsha qulshylyqtary, jasaǵan qaiyrymdylyǵy, barlyq saýapty amaldary eselenip jazylady. Orazany rýhani turǵydan sezingen jan Allanyń teńdessiz syiynan shet qalǵysy kelmeitini sondyqtan.
Oraza – kúndiz iship-jeýden ózin shekteý degen sóz emes. Ramazan – rýhtyń azyǵy, tánniń shipasy. Oraza jan men tándi rýhani tazartatyn úlken sabyr mektebi. Aýzy berik jandar ádep bilmes pendelerdiń ózine jasaǵan keibir oǵash is-áreketterin kórip, turpaiy sózderin estise de: «Men orazamyn», – degen bir aýyz sózben nápsisine toqtaý salyp, sabyr saqtaidy. Al sabyr iesine beriletin syi – jánnat.
Densaýlyǵyna bailanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da – úlken saýap. Paiǵambarymyz Muhammed (oǵan Allanyń salaýaty men sálemi bolsyn): «Alla Taǵala eń bolmasa bir túiir qurma, tipti bir urttam sýmen bolsa da qamqorlyq jasaǵanǵa saýap jazady…» – degen.
Qadirli jamaǵat!
Elbasy Nursultan Nazarbaev «Bolashaqqa baǵdar: rýhani jańǵyrý» atty maqalasynda halqymyzdy ulttyq qundylyqtardy qurmetteýge, týǵan jerdi kórkeitýge, jańashyl oilap, qoǵam úshin igi is jasaýǵa, ón-boiymyzdaǵy rýhani qundylyqty jańǵyrtýǵa úndedi. Elimizdi rýhani jańǵyrýǵa bastaǵan maqala jurtymyzǵa parasatty oi, paiymdy pikir tastady. Al ramazan – rýhani jańǵyrýymyzǵa septigin tigizip, imanymyzdy kúsheitýge múmkindik týǵyzatyn qadiri men qasieti mol ai.
Endeshe, raqym aiy – ramazan qutty bolsyn! Ustaǵan orazamyz, jasaǵan duǵa-tilekterimiz, qulshylyq-ǵibadattarymyz, árbir qaiyrly amaldarymyz qabyl bolǵai! Alla Taǵala otbasymyzǵa amandyq, jumysymyzǵa bereke-birlik násip etkei!
Táýelsizdigimiz baiandy, elimiz aman, jurtymyz tynysh bolǵai! Jaratýshy Iemiz barshamyzdy orazadan orazaǵa deiin aidan aman, jyldan esen jaqsylyqpen jetkize bersin dep tileimin! Áýmin!
Erjan qajy MALǴAJYULY,
Qazaqstan musylmandary dini
basqarmasynyń tóraǵasy, Bas múfti
(Eskertý: 2017 jyldyń 27-mamyry – qasietti Ramazan aiynyń birinshi kúni!)
.jpg)