Foto: QMDB
Búgin Astanada Qurban ait merekesine orai ótken baspasóz máslihatynda Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly kásipkerlerge úndeý jasap, mereke kúnderi halyqqa qolaily baǵa usynýǵa shaqyrdy, dep habarlaidy Ult.kz.
Bas múfti jyl basynda din qyzmetkerlerine joldaǵan baǵdarlamalyq baiandamasynda Qurban ait pen Oraza ait merekelerin ulttyq dástúrge sai qoǵamdyq deńgeide atap ótý qajettigin aitqanyn eske saldy. Onyń sózinshe, biyl ait kúnderi respýblika kóleminde «Qurban ait – ulyq mereke» taqyrybymen túrli igi sharalar uiymdastyrylady.
Sondai-aq oblystyq, qalalyq jáne aýdandyq meshitterdiń aýlalarynda kiiz úiler tigilip, ulttyq sport túrlerinen saiystar ótedi. Budan bólek, elimizdiń ár óńirinde mádeni-rýhani keshter uiymdastyrylmaq.
– Barsha jamaǵatty ulttyq kiim kiip, ait merekesin halqymyzdyń salt-dástúrine sai ulttyq naqyshta atap ótýge jáne igi bastamalarymyzǵa belsendi atsalysýǵa shaqyramyn. Qurban ait – tek dini mereke emes, qoǵamdaǵy birlik pen tatýlyqty nyǵaitatyn, qaiyrymdylyqty dáripteitin rýhani meiram, – dedi Bas múfti.
Naýryzbai qajy Taǵanuly kásipkerlerge arnaiy úndeý jasap, Qurban ait kezinde mal baǵasyn negizsiz kótermeýge, halyqtyń áleýmettik jaǵdaiyn eskerýge jáne kúndelikti tutynatyn azyq-túlik baǵasyna múmkindiginshe jeńildik jasaýǵa shaqyrdy.
