Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly el azamattaryn bir-birine janashyrlyqpen qaraýǵa shaqyrdy, dep habarlaidy "Ult aqparat".
«Qazaqy dúnietanymymyzda da, san ǵasyrdan beri ustanyp kele jatqan asyl dinimiz Islamda da «jaqyn» degen uǵym tek qana úidegi ata-ana, aǵa-baýyr, áiel, bala-shaǵaǵa qatysty qoldanylmaidy. Allanyń aq jolyn, Paiǵambarymyzdyń (oǵan Allanyń salaýaty men sálemi bolsyn) súnnetin ustanyp kele jatqan halqymyz úshin kórshi de, alys-jaqyn aǵaiyn-týys, dos-jaran jaqyny sanalady.Búgin Memleket basshysy Qasym-Jomart Toqaev Qazaq eline úndeý jasady. Syn saǵatynda synbai, bir-birimizge qarailasyp, qol ushyn sozyp, shama kelgenshe materialdyq jáne moraldyq qoldaý bildirip, eń bastysy, osy indet órship turǵan shaqta saqtyq sharalaryna basa kóńil bólýge taǵy da úndedi. Qara jamylyp otyrǵan otbasylarǵa kóńil aityp, aýyryp jatqandarǵa saýyǵyp ketýin tiledi. Buǵan qosa, Prezident 13 shilde – Ulttyq aza tutý kúni bolyp belgilengenin málimdedi», - dedi Bas múfti.
QMDB tóraǵasynyń atap ótýinshe, musylmandar tutas bir aǵza sekildi. Qol synsa, kóz qýanǵan emes, bálkim, ol úshin jasyn tógedi, al kózden jas aqsa, ony qol súrtedi.
«Osy oraida men de el Prezidentiniń Úndeýine tolyqtai qosyla otyryp, el azamattarynan bir-birine janashyrlyqpen qarap, shama kelgenshe qoldaý kórsetýge, járdemdesýge shaqyramyn. Ómirin báigege tigip, ult saýlyǵy úshin aianbai eńbek etip jatqan aq halatty abzal jandarǵa alǵysymdy bildiremin. Sondai-aq dári-dármekti, eń qajetti turmystyq zattar men azyq-túlikti osyndai qiyn-qystaý mezgilde qymbattatpaýǵa shaqyramyn. Al barsha qazaqstandyqtardy 13 shilde kúni barsha álemniń Rabbysy bir Alladan duǵa tilep, kóp istiǵfar aityp, Paiǵambarymyzǵa (oǵan Allanyń salaýaty men sálemi bolsyn) kóptep salaýat aityp, sol kúni bir mezette respýblika imamdarynyń, medrese ustazdarynyń Quran Hatym duǵasyna qosylýǵa shaqyramyn. Barshańyzǵa Alla Taǵalanyń sálemi men raqymy, bereketi bolsyn! Alla qalasa bul kúnderdi de birligimizben eńseremiz!», - dedi Naýryzbai qajy Taǵanuly.
