Qazaqstan musylmandary dini basqarmasy barsha musylman qaýymyn 10 sáýir, juma kúni namaz ýaqytynda «Biz – birgemiz, tilegimiz – ortaq» degen igi bastama aiasynda kúlli adamzattyń amandyǵy úshin bir mezette alaqan jaiyp, duǵa jasaýǵa úndedi, dep habarlaidy "Ult aqparat".
«Asa qamqor, erekshe meiirimdi Allanyń atymen bastaimyn! Áýeli barlyq madaq álemderdiń Rabbysy Allaǵa tán. Adamzattyń asyly Muhammed Paiǵambarǵa onyń otbasy men barsha sahabalaryna salaýat pen sálem bolǵai! Assalamý alaikým ýa rahmatýllahi ýá bárákátýhý! Qurmetti Din Basshylary, musylman baýyrlar! Búginde COVID-19 koronavirýs juqpaly derti jer betindegi álem jurtshylyǵyn alańdatyp otyrǵany barshańyzǵa málim. Ókinishke qarai, bul indetten álemde myńdaǵan adam kóz jumdy. Álemde osy dertten qaza taýyp, qara jamylǵan otbasylardyń qaiǵylaryna ortaqtasyp, kóńil aitamyn. Alla aldynan jarylqasyn! Ómirdi synaq mekeni dep bilgen musylman balasy basyna qiyndyq tússe, tózimdilik tanytady, nyǵmetke bólense, shúkir etedi. Qiyndyqty sabyrǵa jeńdirgen pende Allanyń meiirimine bólenedi. Alla Taǵala: «Sózsiz Biz senderdi qorqynyshpen, ashtyqpen jáne dúnie-múlikterińdi, jandaryńdy, sondai-aq jemisterińdi alý arqyly synaimyz. Sabyr etýshilerdi súiinshile!» («Baqara» súresi, 155-aiat) degen. Alla Taǵala synaqqa sabyr etip, saýapqa kenelgen pendelerinen etkei!», - dedi Bas múfti Qazaqstan musylmandary dini basqarmasynyń resmi saitynda jariialanǵan úndeýinde.
Qazaqstan musylmandary dini basqarmasynyń tóraǵasy qazirgi tańdaǵy bul aýyr indet kúlli adamzat balasyna qater tóndirip turǵanyn basa aitady.
«Biz (Barlyǵymyz) Adam ata jáne Haýa anadan taraǵan bir úmbetpiz. Qasietti Quran Kárimde: «Ýa, adam balalary! Bárińdi bir jannan jaratqan hám odan jubyn jaratyp, ol ekeýinen kóptegen erler men áielder órbitip, jer betine taratqan Rabbylaryńa qarsy kelýden saqtanyńdar!» («Nisa» súresi, 1-aiat) degen. Ardaqty Paiǵambarymyz (oǵan Allanyń salaýaty men sálemi bolsyn): «Ýa, adamdar! Senderdiń barlyǵyń Adam atadan, al Adam topyraqtan jaratyldy ...» dep birlikke úndegen. Rasynda, eshkimniń ulty, násili, tegi Jaratqannyń quzyrynda bir-birinen artyq emes. Quranda: «Ýa, adamzat balasy! Biz senderdi bir Ata, bir Anadan jarattyq. Sondai-aq bir-birlerińdi tanýlaryń úshin senderdi ártúrli ult-ulysqa, rý-taipaǵa bóldik. Rasynda, Allanyń aldynda eń ardaqtylaryń – taqýalaryń» («Hujurat» súresi, 13-aiat) delingen. Álemde etek alǵan indettiń aldyn alýda adamzat Uly Jaratýshynyń meiirimine muqtaj ekendigin aiqyn sezinýde. Sol úshin árbir ult ókili, barsha adam balasy judyryqtai jumylyp, shyn júrekten Jaratqanǵa jalbarynyp, adamzattyń amandyǵyn suraityn syndarly sátte turmyz. Allanyń ardaqty Elshisi (oǵan Allanyń salaýaty men sálemi bolsyn): «Duǵa – musylmannyń qorǵany», – degeni barshańyzǵa málim. Osy rette Qazaqstan musylmandary dini basqarmasy islam áleminiń ǵulamalaryn, kúlli din qairatkerlerin, din salasynyń oqytýshy-ustazdary men Quran qarilaryn jáne barsha musylman qaýymyn 10 sáýir, juma kúni namaz ýaqytynda «Biz – birgemiz, tilegimiz – ortaq» degen igi bastama aiasynda kúlli adamzattyń amandyǵy úshin bir mezette alaqan jaiyp, duǵa jasaýǵa úndeidi. Asa meiirimdi Alla Taǵala kúlli adamzat balasyna amandyq-saýlyq berip, aýrý-syrqaýdan aiyǵyp, qýanyshty kúnderge tezirek jetýin násip etkei», - dep atap ótken Naýryzbai qajy Taǵanuly.
