2017 jyldyń 25 maýsymy – Oraza aittyń birinshi kúni!
Qurmetti otandastar, baýyrlar!
Oraza ait merekesine aman-esen jetkizgen Alla Taǵalaǵa sansyz shúkirler men madaqtar bolsyn. Sizderdi musylman qaýymynyń ulyq, qasterli merekesi – Oraza ait meiramynyń bastalýymen quttyqtaimyn. Ait múbárak bolsyn, aǵaiyn!
Qasietti Ramazan aiynyń aiaqtalǵanyn bildiretin Oraza ait – meiirimdiliktiń, igiliktiń, birliktiń, izettiliktiń, qaiyrymdylyqtyń merekesi. Bul meiram barsha halyqty izgilikke uiytady.
Elimizdiń musylman qaýymy qasietti Ramazanda aýyz bekitip, sharapaty mol aida jasalǵan izgi is-sharalarymyzǵa atsalysty. Meshitterimizde aýyzasharlar men qaiyrymdylyq aktsiialar ótti. Turmys jaǵdaiy tómen otbasylaryna kómek kórsetildi. Saýaby teńdessiz osynaý qaiyrymdylyq sharalarǵa úles qosqan otandastaryma ózimniń jáne Qazaqstan musylmandary dini basqarmasy atynan «Alla razy bolsyn» deimin.
«Ait» sózi – «merekeleý», «hal surasý», «bir-birin qýantý», «qýanyshqa toptalý» degen maǵynalardy bildiredi. Jaratýshy Iemiz árbir izgi amal men igilikti istiń saýabyn berip, meiirim-shapaǵatyn tógedi.
Alla Taǵala: «Men paryz etken orazany pendelerim ótep, aqysyn alýǵa (ait namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...», – deidi.
Oraza ait – bir ai boiy oraza ustap, yqylaspen jaqsylyq jasaǵan adamnyń qurmetke, marapatqa ie bolatyn kezi. Alla barshamyzdy mol saýapqa kenelgen quldarynyń qataryna qosýyn tileimin.
Ait kúninde tolyq jýynyp, jupar iis sebinip, jamaǵatpen ait namazyna qatysýdyń saýaby erekshe. Ait namazyna barýdan buryn qurmadan dám tatý – paiǵambarymyz Muhammedtiń (oǵan Allanyń salaýaty men sálemi bolsyn) súnnet amaly.
Aǵaiyn-týysty, kórshiler men ózge ult ókilderin ortaq merekemen quttyqtap, tileýlestik bildirý – igi amal. Oraza ait – otbasylyq mereke. Meiram kúni ata-anamyzǵa, balalarǵa syilyq úlestirip, aǵaiyn-kórshi, týys, baýyrlardy qonaqqa shaqyryp, airyqsha kóńil bólý de – saýapty is.
Qadirli qaýym!
Oraza ait merekesi qutty bolsyn! Alla Taǵala ustaǵan orazamyzdy, duǵa-tilekterimizdi, qasietti aida jasaǵan árbir qaiyrly amaldarymyzdy, bergen zeket pen pitir sadaqalarymyzdy qabyl etip, mol saýaptan jazǵai!
Árbir otbasyna amandyq, jaqsylyq, denderińizge saýlyq, jumystaryńyzǵa bereke tileimin! Rabbymyz barshamyzdy ramazannan ramazanǵa deiin aman-esen jetkize bersin!
Elimiz aman jurtymyz tynysh, Táýelsizdigimiz baiandy bolǵai! Áýmin!
Erjan qajy MALǴAJYULY,
Qazaqstan musylmandary dinii basqarmasynyń tóraǵasy,
Bas múfti
