Ulttyq Olimpiada komitetiniń bas hatshysy Andrei Kriýkov olimpiadalyq sport túrleri boiynsha bas bapkerlerdiń ailyǵy qansha ekenin aitty, dep habarlaidy QazAqparat.
«2018 jyly halyqaralyq sanattaǵy jáne sporttyq rezervtegi sportshylardy, olimpiadalyq sport túrleri boiynsha ulttyq qurama múshelerin halyqaralyq jarystarǵa daiyndaý týraly memlekettik tapsyrma berildi. Bul tapsyrmany iske asyrýdy qyzmetkerlerdiń aýysýynan bastadyq. Iaǵni Mádeniet jáne sport ministriligine baǵynyshty uiymdar Ulttyq Olimpiada komitetiniń qurylymyna ótti. Memlekettik tapsyrmany oryndaýǵa barlyǵy 72 adam tartyldy. Ulttyq olimpiada komiteti osy memlekettik tapsyrmany oryndaityn ákimshilik-basqarý apparaty qyzmetkerleriniń ailyq qorynyń 42 paiyzyn óz qarajaty esebinen tólep otyr. Sportshylar men bapkerlerge tólenetin aqsha aitarlyqtai kóterildi. Buǵan deiin bas bapkerlerdiń ortasha eńbekaqysy 180 myń teńgeden aspaityn. 2019 jyldan bastap bas bapkerlerdiń ailyǵy 450 myń teńgege deiin kóterildi», - dedi komitettiń hatshysy.
Sondai-aq, ol Olimpiada oiyndaryna joldama utyp alynǵan sport túrleri boiynsha sportshylar men bapkerlerdiń ailyǵy aitarlyqtai óskenin atady.
«2018 jyldan bastap óńirlerdiń bárinde materialdyq-tehnikalyq bazany túgendeý júrgizildi. Mamandar óńirlerdiń bárin aralap shyqty. Qorytyndysy boiynsha qalyptasqan problemalardy jergilikti deńgeide sheshý usynyldy. Sondai-aq, elimiz boiynsha 60-tan astam jańa sport nysany akkreditteldi», - dedi Andrei Kriýkov.
