FIDE World Team Rapid and Blitz Championships 2026 komandalyq álem chempionaty rapid týrnirimen bastaldy. Qazaqstandyq Barys komandasy týrnirdiń eń jarqyn jeńisteriniń birin kórsetip, álemdik reiting kóshbasshysy Magnýs Karlsen oinaityn WR Chess komandasyn 4:2 esebimen jeńdi, dep habarlaidy ult.kz.
Barys komandasyna jeńis upailaryn Piotr Svidler, Ailin Zarqym jáne Alýa Nurman ákeldi. Taǵy bir mańyzdy teń nátijeni (qara figýralarmen) Ramazan Jalmahanov 2021 jylǵy blits boiynsha álem chempiony Maksim Vashe-Lagravqa qarsy jasady.
Segiz týrdan keiin Barys týrnir kestesinde 12 matchtyq upaimen úshinshi orynda tur. Odan joǵary tek qytailyq Dragon Chilling (14 upai) jáne úndistandyq Team MGD1 (13 upai) komandalary.
Barys.kz komandasynyń quramynda Dmitrii Andreikin, Piotr Svidler, Denis Mahnev, Ramazan Jalmahanov, Daniial Sapenov, Erǵali Súleimen, Kseniia Balabaeva, Alýa Nurman jáne áýesqoi Ailin Zarqym bar. Komanda kapitany — Qazaqstan shahmat federatsiiasynyń atqarýshy direktory Gúlmira Dáýletova.
Qazaqstan shahmat federatsiiasy jáne onyń bas demeýshisi Freedom Holding Corp. Gonkongta eki komandamen — Kazchess jáne Barys usynylǵan. Segiz týrdan keiin qazaqstandyq Kazchess komandasy 11 upaimen tórtinshi orynda tur.
Kazchess quramynda Bibisara Asaýbaeva, Qazybek Nógerbek, Aldiiar Ansat, Merýert Kamalidenova jáne áýesqoi Kumar Túlepuly oinaidy. Sondai-aq komanda úshin myqty sheteldik grossmeisterler: Shahriiar Mamediarov, Aleksandr Grishýk, Rihard Rapport jáne Van Hao óner kórsetýde. Kazchess kapitany — QShF birinshi vitse-prezidenti Darmen Sadvakasov.
Rapid jáne blits boiynsha komandalyq álem chempionaty 17–21 maýsym aralyǵynda Queen Elizabeth Stadium arenasynda ótýde. Rapid týrnirine 48 komanda qatysýda. Matchtar 6 taqtada ótedi, ár komanda quramynda mindetti túrde bir áiel jáne Elo reitingi 2000-den tómen áýesqoi oiynshy bolýy tiis. Týrnir 12 raýnd boiynsha shveitsar júiesimen, 15+10 ýaqyt baqylaýymen (partiiaǵa 15 minýt + ár júriske 10 sekýnd qosymsha) ótedi.
Alda qatysýshylardy rapid týrniriniń sońǵy tórt týry kútip tur. Olar aiaqtalǵan soń álem chempionatynyń jeńimpazdary men júldegerleri anyqtalady.
