Foto: twitter.com/TRTWorldNow
Barselona túbinde eki poiyz soqtyǵysyp, kem degende 155 adam zardap shekti, - dep habarlaidy Tengrinews.kz agenttigi Daily Mail basylymyna silteme jasap.
Oqiǵa Barselona mańyndaǵy Monkada-i-Reshak qalasynyń vokzalynda bolǵan. Jergilikti ýaqyt boiynsha shamamen tańǵy saǵat 7:50-de jolaýshylar poiyzy basqa poiyzben soqtyǵysqan.
Kataloniianyń tótenshe jaǵdailar qyzmeti 150 adam jeńil jaraqat alǵanyn, 5 adamnyń jaǵdaiy ortasha aýyr ekenin habarlady. Jergilikti BAQ málimetinshe, 3 adam jaraqatpen aýrýhanaǵa jetkizilgen, onyń ishinde tobyǵy synǵan adam bar.
Ázirge apattyń sebepteri týraly aqparat aitylmaǵan. Politsiia tergeýdi bastady. Búginde barlyq jolaýshy poiyzdardan evakýatsiialanǵan. Úsh temirjol jelisi boiynsha poiyzdar qozǵalysy kidirispen júzege asyrylady.
