Almaty ákimdigi metronyń "Qalqaman" stantsiiasynan "Barlyq" bazaryna deiin sozylatyn jańa jelisin jobalaý boiynsha tender jariialady. Jobaǵa shamamen 3 mlrd teńge bólinýi josparlanǵan, dep habarlaidy ult.kz.
Memlekettik satyp alý portalyndaǵy aqparatqa sáikes, konkýrsqa qatysýǵa ótinimder 9 maýsymǵa deiin qabyldanady.
Jobalaý-smetalyq qujattamaǵa sai, jańa jeli Abai dańǵyly boiymen Alataý dańǵylyna deiin, odan ári Raiymbek dańǵylyna shyǵyp, keiin "Barlyq" bazaryna deiin jalǵasady. Baǵyt boiynda úsh jańa metro beketi salynady. Barlyǵy araldyq platformasy bar, tereń emes jer asty stantsiialary bolady.
Joba aiasynda úshinshi bekette Raiymbek dańǵylynyń astynan ótetin eki shyǵysy bar jerasty ótkeli qarastyrylǵan. Jaiaý júrginshiler tonnelderinde qoǵamdyq dárethanalar men bankomattarǵa arnalǵan oryndar jabdyqtalýy tiis.
Qurylys jáne árleý jumystarynda qazaqstandyq ónimderge basymdyq berilip, órt qaýipsizdigi men sanitarlyq talaptarǵa sai materialdar qoldanylýy qajet.
Sondai-aq ár stantsiianyń keminde bes túrli rakýrstan jasalǵan egjei-tegjeili 3D-modeli ázirlenedi. Jobalaý barysynda Almatynyń seismikalyq erekshelikteri eskerilip, arnaiy normativtik talaptar saqtalýy tiis.
