Parlament Májilisiniń jalpy otyrysynda «2020-2022 jyldarǵa arnalǵan respýblikalyq biýdjet týraly» QR Zańyna ózgerister men tolyqtyrýlar engizý týraly» zań jobasy maquldandy, dep habarlaidy "Ult aqparat".
«Sizderdiń qaraýlaryńyzǵa 2020-2022 jyldarǵa arnalǵan respýblikalyq biýdjetti naqtylaý týraly Zań jobasy usynylyp otyr. Naqtylaýdyń negizgi mindeti - meditsinalyq qyzmetkerlerge materialdyq qoldaý kórsetý jáne COVID-19-dyń taralý múmkindiginiń ekinshi tolqynyna qarsy belsendi sharalar qabyldaý. Osy máselelerdi sheshý úshin 238,7 mlrd teńge somasynda qosymsha shyǵystar kózdeldi», - dedi Qarjy ministri Erulan Jamaýbaev.
Olar mynadai baǵyttarǵa jumsalatyn bolady:
- karantin is-sharalaryn júrgizýge tartylǵan meditsina qyzmetkerlerine jalpy somasy 143,4 mlrd teńgege qosymsha aqy tóleý;
- tegin meditsinalyq kómektiń kepildendirilgen kólemi aiasynda COVID-19-dyń taralýyna jol bermeý maqsatynda meditsinalyq qyzmetterge aqy tóleýge - 83,2 mlrd teńge;
- ishki ister organdarynyń qyzmetkerlerine epidemiiaǵa qarsy is-sharalarǵa qatysqany úshin syilyqaqylar tóleýge – 11,7 mlrd teńge.
«Ákimshiler usynǵan qarajatty qaita bólýdi eskere otyryp, ekonomikanyń naqty sektoryn damytýǵa jáne kúsh qurylymdaryn áleýmettik qoldaýǵa 261,7 mlrd teńge somasynda shyǵystar kózdelgen. Osy qarajat esebinen óndiristi yntalandyrýǵa baǵyttalǵan birqatar sharalar men jobalardy iske asyrý jáne halyqtyń ómir súrý sapasyn jaqsartý men tabysyn ulǵaitý josparlanýda.
Bul rette, barlyq memlekettik baǵdarlamalardyń is-sharalaryn jetkilikti qarjymen qamtamasyz etý kózdelgen. Budan basqa, biýdjetti naqtylaý sheńberinde Prezident Jarlyǵyna sáikes memlekettik organdar qurý jáne qaita uiymdastyrý boiynsha qarajatty qaita bólý júzege asyryldy», - dedi E. Jamaýbaev.
Nátijesinde, respýblikalyq biýdjettiń parametrleri kelesidei qalyptasty. Respýblikalyq biýdjet túsimderi 185 mlrd teńgege ulǵaiyp, 12 trln teńge kóleminde anyqtaldy.
Tapshylyq jalpy ishki ónimge 3,5 paiyz deńgeiinde saqtaldy. Respýblikalyq biýdjet shyǵystarynyń kólemi 205 mlrd teńgege ósip, 14,5 trln teńgeni quraityn bolady.
