Almatyda ákimdikte ótken qoǵamdyq keńes músheleri men IID qyzmetkerleriniń otyrysynda Almaty prokýrory Berik Júiriktaev qaladaǵy qylmys týraly statistikalyq derekterdi keltirdi, dep habarlaidy QazAqparat tilshisi.
«Almaty - elimizdiń asa iri qarjy, bilim, mádeni ortalyǵy. Ishki jáne syrtqy kóshi-qon kórsetkishteri artyp keledi. Búginde quqyq buzýshylyqtyń 20 %-y Almatyǵa tiesili. Qylmystyq jaýapkershilikke tartylǵandardyń 31%-y - basqa óńirden kelgender nemese sheteldik azamattar(5 626 adamnyń 1 785-i)», - dedi prokýror.
Sonymen qatar, prokýror adamnyń jeke tulǵasyna jasalǵan qylmysqa qarsy kúres áli de qanaǵattanarlyq deńgeide emestigin aitty. Mundai qylmystar 4%-ǵa, tonaýshylyq 18%-ǵa artqan. Sonymen qatar, kámelettik jasqa tolmaǵandardyń arasyndaǵy qylmys 6%-ǵa artqan. Jyl basynan beri 2,5 myń jol oqiǵasy tirkelgen. Onda 3 myń adam japa shekse, 75 jaǵdai qaiǵyly jaǵdaida aiaqtaldy.
«Almatyda kólik qozǵalysy óte ózekti. Biraq bul qolymyzdy siltei saldyq degen sóz emes. Barlyq qylmystardyń 70 paiyzy - bótenniń múlkin urlaý. Osy qylmystardan 2 mlrd teńgege jýyq shyǵyn keltirildi», - dedi B.Júiriktaev.
Alaida, páter tonaý men uialy telefondardy jymqyrý sáikesinshe 31% jáne 14%-ǵa qysqarǵan, Al kólik urlaý deregi 9,5%-ǵa artty.
Almaty prokýrory qalalyq IID ókilderine jumysty jaqsartý baǵytynda birqatar nusqaýlyqtar berdi.
«Urlyq qylmystaryn ashýǵa bar kúshti salý kerek. Urlanǵan zattardy satyp, aqsha jasaý joldaryn da kes-kestegen jón. Memleket basshysynyń quqyqbuzýshylyqqa - nól tózimdilik týraly tapsyrmasyn belsendi oryndaý qajet», - dedi B.Júiriktaev.
