Halyqaralyq aýyr atletika federatsiiasy doping daýyna bailanysty Qazaqstan quramasyna 2020 jylǵy Olimpiadaǵa 2 kvota ǵana bólgen, dep habarlaidy QazAqparat.
«Qazirgi ýaqytta doping daýyna bailanysty Halyqaralyq aýyr atletika federatsiiasy Qazaqstanǵa tek eki kvota (1 áiel, 1 er adam – avt.) bólip otyr. Qai sportshylardyń baratyny áli aiqyndalǵan joq. Bizdiń federatsiia sportshylardy nátijesi boiynsha ǵana tańdaityn bolady. Kim barynsha kóp salmaq kóterip, medaldan úmitti bolsa – sol Olimpiada oiyndaryna barady», - dedi OKQ-da ótken baspasóz máslihatynda Sport jáne dene shynyqtyrý isteri komiteti tóraǵasy Serik Sápiev.
Komitet tóraǵasynyń aitýynsha, Parlament Májilisinde doping qoldanǵan sportshylarǵa jazany kúsheitý týraly zań birinshi qaralymda maquldanyp qoiǵan.
«Olimpiada aldynda sportshylarymyz eki-úsh márte tekseriledi. Olardan osy Qazaqstanda doping-synama alamyz. Ol doping-synamalar Germaniiaǵa joldanyp, qaralady. Kimde-kim dopingti tutynǵany anyqtalsa – sózsiz olar Olimpiadaǵa barmaidy. Ol máselege qatty qarap otyrmyz», - dedi Serik Sápiev.
Aita ketsek, dál qazirgi ýaqytta Japoniia astanasy Tokioda ótetin Jazǵy Olimpiada oiyndary boiynsha ulttyq qurama enshisinde ázirge 14 túrinen 25 litsenziia bar.
