Ekinshi orta salmaqtaǵy qazaqstandyq boksshy Aidos Erbosynulynyń bapkerleriniń biri Emanýel Savoi kýbalyq David Morrelge qarsy kezdesý nege erte toqtatylmaǵanyn aityp berdi, dep jazady Vesti.kz saity ESPN portalyna silteme jasap.
Bul jekpe-jek 6 qarasha kúni Minneapolis (AQSh) qalasynda ótti. Kezdesýdiń 12-raýndynda Erbosynuly nokaýtpen jeńildi. Boks keshinen keiin dárigerler ony ringten zembilmen alyp ketti. Al keshe Aidosqa operatsiia jasaldy.
Bas bapkerdiń kómekshisi Savoidyń aitýynsha, ol onynshy raýndtan keiin kezdesýdi toqtatqysy kelgen. Biraq boksshynyń ózi men bas bapkeri Qanat Oraqbaev aiqasty jalǵastyra berýdi jón sanaǵan.
"Negizi meniń qolymda aq oramal boldy. Men ony laqtyrýǵa daiyn edim. Biraq Aidostyń ózi kezdesýdi jalǵastyrǵysy keldi. Onyń bas bapkeri (Oraqbaev - red) de jalǵastyrýda jón sanady. Qanat Aidostyń jaǵdaiyn kórip, bári jaqsy dedi.
Nokdaýnnan keiin de Aidostyń jaǵdaiy durys edi. Esinen tanǵan joq. Tóreshini tanyp turdy. Ol basyn kóterip, kezdesýdi jalǵastyrǵysy keletinin aitty. Erbosynuly sońyna deiin barǵysy keldi. Aidos - keremet jigit.
Qazir men ol týraly aitqym kelmeidi. Oilasam, ýaiymdap kete beremin. Tek Aidos tezirek jazylyp ketedi dep sengim keledi", - dedi ol.
