ەكٸنشٸ ورتا سالماقتاعى قازاقستاندىق بوكسشى ايدوس ەربوسىنۇلىنىڭ باپكەرلەرٸنٸڭ بٸرٸ ەمانۋەل ساۆوي كۋبالىق داۆيد موررەلگە قارسى كەزدەسۋ نەگە ەرتە توقتاتىلماعانىن ايتىپ بەردٸ, دەپ جازادى Vesti.kz سايتى ESPN پورتالىنا سٸلتەمە جاساپ.
بۇل جەكپە-جەك 6 قاراشا كٷنٸ ميننەاپوليس (اقش) قالاسىندا ٶتتٸ. كەزدەسۋدٸڭ 12-راۋندىندا ەربوسىنۇلى نوكاۋتپەن جەڭٸلدٸ. بوكس كەشٸنەن كەيٸن دەرٸگەرلەر ونى رينگتەن زەمبٸلمەن الىپ كەتتٸ. ال كەشە ايدوسقا وپەراتسييا جاسالدى.
باس باپكەردٸڭ كٶمەكشٸسٸ ساۆويدىڭ ايتۋىنشا, ول ونىنشى راۋندتان كەيٸن كەزدەسۋدٸ توقتاتقىسى كەلگەن. بٸراق بوكسشىنىڭ ٶزٸ مەن باس باپكەرٸ قانات وراقباەۆ ايقاستى جالعاستىرا بەرۋدٸ جٶن ساناعان.
"نەگٸزٸ مەنٸڭ قولىمدا اق ورامال بولدى. مەن ونى لاقتىرۋعا دايىن ەدٸم. بٸراق ايدوستىڭ ٶزٸ كەزدەسۋدٸ جالعاستىرعىسى كەلدٸ. ونىڭ باس باپكەرٸ (وراقباەۆ - رەد) دە جالعاستىرۋدا جٶن سانادى. قانات ايدوستىڭ جاعدايىن كٶرٸپ, بەرٸ جاقسى دەدٸ.
نوكداۋننان كەيٸن دە ايدوستىڭ جاعدايى دۇرىس ەدٸ. ەسٸنەن تانعان جوق. تٶرەشٸنٸ تانىپ تۇردى. ول باسىن كٶتەرٸپ, كەزدەسۋدٸ جالعاستىرعىسى كەلەتٸنٸن ايتتى. ەربوسىنۇلى سوڭىنا دەيٸن بارعىسى كەلدٸ. ايدوس - كەرەمەت جٸگٸت.
قازٸر مەن ول تۋرالى ايتقىم كەلمەيدٸ. ويلاسام, ۋايىمداپ كەتە بەرەمٸن. تەك ايدوس تەزٸرەك جازىلىپ كەتەدٸ دەپ سەنگٸم كەلەدٸ", - دەدٸ ول.
