Kollaj: Ult.kz
Eks-prezident Nursultan Nazarbaevtyń Máskeýge saparynan keiin Májilis depýtaty Ermurat Bapi ulttyq qaýipsizdikti qorǵaý maqsatynda memlekettik qupiialardy biletin burynǵy joǵary laýazymdy tulǵalardyń shetelge shyǵýyn zańnamalyq turǵyda retteýdi usyndy. Bul týraly ol óziniń Facebooke paraqshasynda jazdy. Osy rette Ult.kz tilshisi depýtattyń ózimen jolyǵyp, osy másele tóńireginde tolyǵyraq surap bildi.
N. Nazarbaev Resei prezidenti V. Pýtinmen kezdesýge jeke basynyń máselelerin kúittep barǵan bolýy kerek dep boljaityn depýtat Ermurat Bapi eks-prezidenttiń bul áreketin tragediiaǵa balady.
«Bul ‒ eldi 30 jylǵa jýyq bilegen jeke-dara tulǵanyń tragediiasy dep bilemin. Óziniń halqy ózine pana bola almai, syrt eldiń basshysynan baryp, óziniń jaǵdaiyn oilastyryp júrgeni jaqsylyq emes. Ol jerge baryp Qazaqstan men qazaqtyń taǵdyryn aitqan joq qoi. Ol Pýtinge Qazaqstannyń ekonomikasyna, saiasi jaǵdaiyna bailanysty aitty dep oilamaimyn. Bul ‒ jeke bastyń kúiki tirliginiń, biznes, baiý, kapital, aktivter, týysqandary men bala shaǵasy turǵysynda usaq áńgime dep oilaimyn», ‒ dedi E. Bapi.
«Al burynǵy prezidentten Qazaqstan biligine jáne halqyna qandai qaýip bar?» ‒ degen suraǵymyzǵa depýtat Nazarbaevtan eshqandai qaýip tónbeidi dep esepteitinin jetkizdi.
«Birinshiden qazir elde qalyptasqan zańdardyń, Konstitýtsiialyq normalardyń negizinde ornyqqan bilik bar. Qoǵamda «ekinshi Qańtar bolýy múmkin» dep aityp jatyr ǵoi. Ondaidy uiymdastyratyn onda ondai múmkindik joq», ‒ dedi májilismen.
Ermurat Bapidyń oiynsha Nursultan Nazarbaev Vladimir Pýtinmen kezdesetinin Qasym-Jomart Toqaevqa jáne quzyrly organdarǵa aitýy kerek bolǵan.
«Ol shetke shyǵatynyn el Prezidentimen aqyldasty ma? Nemese tiisti memlekettik organdardyń aldynda eks-prezident retinde aitty ma? Meniń oiymsha ondai kelisim bolǵan joq. Al Qazaqstannyń máselesin syrtqa baryp óziniń jeke bas máselesi turǵysynda talqylap júrýi bizdi oilandyrýy kerek», ‒ dedi ol.
Bapi joǵary laýazymdy qyzmette bolǵan tulǵalardyń báriniń shet elge shyǵý máselesin retteý kerek dep sanaidy.
«Máselen Qojamjarov ketip qaldy. (Qairat Qojamjarov 2008–2017 jyldary aralyǵynda túrli ataýmen Sybailas jemqorlyqqa qarsy is-qimyl qyzmetin basqardy. 2017 jyldan 2019 jylǵa deiin ol Bas prokýror boldy, red) Bizde nege aldyn ala onyń syrtqa shyǵý siiaqty osyndai zań normalary bolmady? Osy siiaqty qazir Eýropada, basqa elderde qashyp júrgen Qazaqstannyń qupiiasyn biletin, Qazaqstanǵa álde bir áseri bar, qoǵamdyq uiymdar quryp alǵan, álde bir onyń múddesin qorǵaityn baspasóz quraldary bar, qoǵamda ártúrli taqyryptar qozǵap júretin qanshama laýazymdy tulǵalary bar», ‒ dedi depýtat óz sózinde.
Áriptesiniń bastamasyn Depýtat Abazal Quspan da quptaidy. Zańger-depýtat óte mańyzdy memlekettik qyzmet atqarǵan azamattar osyndai shekteýlerdi sanaly túrde qabyldaýy kerek dep esepteidi. Ol buǵan deiin de memlekettik qupiiaǵa ie bolǵan memlekettik qyzmetshilerdiń shetelge shyǵý máselesin qatańdatý kerek dep málimdeme jasaǵanyn aitty.
Foto: Májilis
«Iaǵni zeinetke shyqqannan keiin de olarǵa belgili bir ýaqyt shetelge shyǵýǵa múldem tyiym salý jaǵyn da qatańdatýymyz qajet. Memdekettik qupiia jóninde zań bizde joq emes, bar. Biraq ol sol zańnyń jekelegen normalaryn kúsheitýdi ómirdiń ózi qajet etip otyr. Sonymen qatar ony ózge elderdiń praktikasynan kórip otyrmyz. Ony óz tájiribemnen mysal retinde keltireiin. Mysaly Qytai elinen kelýi kerek qonaqtarymyz kele almai qaldy. Sebebi olar aýdandyq deńgeide jerasty qubyrlaryn biletin maman eken. Ol Respýblikalyq deńgeide eshqandai qyzmet atqarmaǵan adam, tek aýdandyq deńgeide qyzmet istegen. Ol zeinetke shyqqannan ondaǵan jyl ótse de Qytai eli shyǵýǵa ruqsat bergen joq mysaly», ‒ degen depýtat Quspan Qazaqstanda zań Qytaidaǵydai qatań bolmasa da, osy máseleni rettestirý kerek dep esepteidi.
Joǵary laýazymdy qyzmette bolǵan, memlekettiń qupiia derekterin biletin azamattyń shetelge shyǵýyn shekteý týraly depýtattar ázirge talqylaý ústinde, naqty zań qabyldap, áreketter qashan bolatyny belgisiz.
Foto: stan.kz
Aita keteiik senbi kúni keshke Qazaqstannyń eks-prezidenti Nursultan Nazarbaevty Resei Prezidenti Vladimir Pýtin qabyldap, kezdesý ótkizdi.
«Kremlde Vladimir Pýtinniń Qazaqstannyń tuńǵysh prezidenti Nursultan Nazarbaevpen kezdesti», – dep jazdy Kremldiń baspasóz qyzmeti.
Alaida Qazaqstannyń burynǵy basshysy men Resei prezidenti ne sebepti kezdeskeni aitylmady.
Baljan Jeńisqyzy
