Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova el ekonomikasyndaǵy bank sektorynyń róli tómendep bara jatqanyn málim etti, dep habarlaidy QazAqparat.
«Ómir sapasy basym jaǵdaida nesieleý esebinen qamtamasyz etilip otyr. 2019 jyly tutynýshylyq nesie halyqtyń nominaldy tabysynyń ósiminen shamamen 15 paiyzǵa basyp ozdy. Al nesie ala berýdiń saldary áleýmettik problemalardy týyndatady. Memleket tarapynan aitarlyqtai kómektiń bolǵanyna qaramastan, keiingi bes jylda el ekonomikasyndaǵy bank sektorynyń róli tómendep barady. JIÓ-degi onyń aktivteri 40 paiyzǵa deiin azaidy. 2015 jyly bul kórsetkish 60 paiyzǵa teń edi. JIÓ-men eseptegende bankterdiń qaryz beretin portfeli eki ese qysqardy. Problemalyq qaryzdar artyp barady», - dedi Natalia Godýnova Parlament Senatynda 2019 jylǵy respýblikalyq biýdjettiń atqarylýy týraly esepti baiandaý kezinde.
Onyń aitýynsha, biznes úshin qoljetimdi aqsha berý máselesi áli de rettelmei keledi.
«Memlekettik qaryz, sol sekildi Úkimettiń qaryzy qaýipsiz shekte tur. Degenmen, shyǵyndar da artyp keledi. Úkimettik qaryzdyń bul baǵyttaǵy shyǵyny 1,4 trln teńgege jetti. Degenmen, halyqaralyq qarjy uiymdarynan memlekettik-jekeshelik áriptestik, kvazimemlekettik sektor men jergilikti atqarýshy organdar boiynsha qaryz alý jumystaryn júiege keltirdik», - dedi ol.
