Bankter Qazaqstannyń depozitterge kepildik berý qory (QDKBQ) keiin depozitter boiynsha mólsherlemelerdi qaita qaraýda, dep habarlaidy "Ult aqparat" qordyń baspasóz qyzmetine silteme jasap.
Eske salamyz, Qazaqstannyń depozitterge kepildik berý qory (QDKBQ, Qor) merzimsiz, sondai-aq qysqa merzimge salynǵan merzimdi jáne jinaq depozitter boiynsha usynylǵan eń joǵary mólsherlemelerdiń qaita qaralǵan mánderin jariialaǵan bolatyn. Bul rette merzimsiz depozitter boiynsha usynylǵan eń joǵary mólsherleme - 12,5 paiyzǵa, al qysqa merzimge salynǵan merzimdi jáne jinaq depozitter boiynsha - 13 paiyzǵa deiin joǵarylady.
Jeke tulǵalardyń qaitadan tartylǵan depozitteri boiynsha maksimaldy syiaqy mólsherlemesin anyqtaý jáne bekitý ádistemesinde kórsetilgenindei, jańartylǵan mólsherlemeler týraly aqparat Qordyń banktermen ózara yqpaldastyǵy aiasynda qarjy institýttaryna 2020 jyldyń 10 naýryzynda – maksimaldy mólsherlemeler qaita qaralǵan kúni joldandy.
Aǵymdaǵy jyldyń 11 naýryzyndaǵy jaǵdai boiynsha bankter depozitter boiynsha mólsherlemelerdi qaita qarap jatyr. Al birqatary teńgedegi 3 ailyq merzimsiz jáne jinaq depozitteri boiynsha mólsherlemelerdi eń joǵary mánge deiin kóterdi.
Búginde teńgedegi depozitter boiynsha tabystylyq sheteldik valiýtadaǵy depozitterge qaraǵanda edáýir joǵary jáne infliatsiiany (6%) tolyǵymen óteidi. Qordyń ulttyq valiýtadaǵy depozitter boiynsha maksimaldy mólsherlemelerdi ulǵaitý jaǵyna qarai qaita qaraýy qazaqstandyqtar úshin kez kelgen merzimge arnalǵan teńgelik depozitterdiń joǵary tabystylyǵyn jáne tartymdylyǵyn saqtaýǵa múmkindik beredi.
