Qazaqstan avtobiznes qaýymdastyǵynyń baspasóz hatshysy Stanislav O Iýn Bem bankter 4 paiyzdyq avtonesieniń saqtandyrý polisin birden tóleýdi talap ete almaitynyn rastady, dep habarlaidy QazAqparat.
Telegram-arnalar 4 paiyzdyq avtonesie rásimdeýshilerden VIN-kod talap etilmeitin bolǵanyn jáne nesieni saqtandyrý polisiniń qunyn 0,95 paiyzǵa túsirý týraly sheshim qabyldanǵanyn jazyp jatyr.
«Ónerkásipti damytý qory» men «Qazaqstan avtobiznes qaýymdastyǵy» bul málimetterdi ishinara rastady.
Naqtyraq aitsaq, 4 paiyzdyq avtonesie rásimdeýshilerden VIN-kod talap etilmeidi.
«Nesie rásimdeý úshin VIN-kod usyný talabyn uzynsonar kezek bolmaý úshin alyp tastadyq. Bank úshin eń mańyzdysy – tólem shotyn ákelgen tutynýshynyń tólem qabileti. Al saqtandyrý boiynsha bankterge hat joldap, KASKO saqtandyrý tólemin 7 jylǵa avtonesie merzimine birden tóleýdi talap etpeý týraly nusqaý berdik. Iaǵni, saqtandyrý tólemin jylma-jyl tólep otyrýǵa bolady. Tek boryshker avtonesieniń tutas merzimine saqtandyrý polisin birden tólep tastaǵysy kelse ǵana mundai operatsiiaǵa jol beriledi. Iaǵni, jylma-jyl tólep otyra ma, álde birden birneshe jylǵa tólep tastai ma, ony nesie alýshynyń ózi sheshedi. Bank tek alǵashqy jyldyń saqtandyrý qunyn ǵana surai alady», - dep túsindirdi «Ónerkásipti damytý qorynyń mamandary.
Qazaqstan avtobiznes qaýymdastyǵynyń baspasóz hatshysy Stanislav O Iýn Bemniń aitýynsha, mundai másele qazir 4 paiyzdyq avtonesie berip jatqan 2 banktiń tutynýshylarǵa eki túrli talap qoiýynan paida bolǵan.
«Qazir avtonesieni 2 bank berip bastady. Solardyń biri nesieni saqtandyrý polisiniń qunyn jyl saiyn tóleýge ruqsat berse, ekinshisi nesie alǵan merzimge túgel aldyn ala tóleýdi talap etken. Mysaly adam 10 mln teńgeniń kóligin almaqshy deiik. Bul baǵdarlama boiynsha, saqtandyrý quny kólik qunynyń 0,95 paiyzyna teń. Al nesie merzimi 7 jyldan aspaýy kerek. Sonda 7 jyldyq saqtandyrý polisiniń quny 700 myń teńgege jýyqtaidy. Ondai aqshany nesiege kólik alǵaly júrgen adamnyń bári birden taýyp bere almaýy múmkin. Sondyqtan bankter birden búkil merzimge tóleý talabyn qoia almaityndai sheshim qabyldanyp otyr. Ónerkásipti damytý qory bankterge osyndai eskertpe joldady», - dep túsindirdi qaýymdastyq ókili.
Sondai-aq, ol 4 paiyzdyq avtonesieniń buǵan deiingi baǵdarlamasy boiynsha saqtandyrý polisiniń quny qazirgiden joǵary bolǵanyn, 7 jyldaǵy shyǵyny 1,5 mln teńgeden asyp ketken jaittar bolǵanyn aitady.
Al jańartylǵan baǵdarlama boiynsha onyń mólsheri kólik qunynyń 0,95 paiyzyna teń.
