Kórneki sýret: elements.envato.com
Bankrot dep tanylǵan Qazaqstan azamattaryna shekaradan shyǵýǵa eshqandai shekteý qoiylmaidy. Bul týraly qarjy vitse-ministri Erjan Birjanov málimdedi, dep habarlaidy Sputnik Qazaqstan.
Aitýynsha, kei elderde bankrot bolǵan adamdarǵa shetelge shyǵýǵa tyiym salynady. Biraq Qazaqstan zańnamasynda mundai norma joq.
Tek sot bankrottyǵy boiynsha protsedýra júrgiziletin kezeńde ǵana el aýmaǵynan shyǵýǵa bolmaidy.
"Bizdiń zańnamada tek qana ekinshi tásil (sot bankrottyǵy) boiynsha sotqa júgingen kezde, protsedýra alty ai qaralatyn kezde ǵana shekteý qoiylady. Sebebi protsedýra sozylyp ketýi múmkin. Azamat sotqa júginip, shet elge shyǵyp ketse, protsedýra toqtap qalady. Sondyqtan naqty sheshim qabyldanǵa deiin shekteý qoiylady", - dep túsindirdi Birjanov ortalyq kommýnikatsiialar qyzmetinde ótken baspasóz máslihatynda.
Ol bankrottyq alǵannan keiin adamǵa eshqandai shekteý qoiylmaitynyn atap ótti.
"Sheshim qabyldandy ma, ekinshi kúnnen bastap shetelge shyǵýǵa múmkindigi bar. Shekarada ondai shekteý joq", - dedi vitse-ministr.
Eske salsaq, bankrottyqqa ótinish qabyldaý 3 naýryzda bastalady.
Qaryzyn tólei almai júrgen qazaqstandyqtar 3 túrli rásim boiynsha kreditinen qutyla alady.
Birinshi rásim – sottan tys bankrottyq. Ony tek bankter, mikroqarjy uiymdary jáne kollektorlyq agenttikter aldyndaǵy qaryzdar boiynsha qoldanýǵa bolady.
Myna sharttar saqtalýy qajet:
- borysh 5,5 mln teńgeden (1600 AEK) aspaidy;
- kredit 12 ai boiy ótelmegen bolýy kerek;
- menshiginde tirkelgen múlik, onyń ishinde ortaq menshiktegi múlik bolmaǵan jaǵdaida;
- bankpen retteý júrgizilgennen keiin jasalady.
Bul rette ataýly áleýmettik kómek alýshylar úshin 6 ai ishinde jáne bereshegi 5 jyldan artyq ótelmegen azamattar úshin erekshe jaǵdailar kózdelgen.
Ekinshi rásim – sot bankrottyǵy. Sot bankrottyǵynyń maqsaty – bankrottyń múliktik massasy esebinen kreditorlardyń talaptaryn barynsha qanaǵattandyrý. Bul rásimdi qarjy basqarýshylary júzege asyrady, olardyń quramyna jumys istep turǵan ákimshiler, kásibi býhgalterler, zań keńesshileri men aýditorlar kiredi.
Úshinshi rásim, bul – tólem qabilettiligin qalpyna keltirý, onda sot arqyly boryshty bólip-bólip tóleý (5 jylǵa deiin) múmkindigi kózdeledi. Onyń artyqshylyǵy – azamat "bankrot" dep sanalmaidy. Demek bankrot úshin kózdelgen saldarlar oǵan qoldanylmaidy.
