Dúkende nominaly 1000 teńge bolatyn «Kúltegin» estelik banknotyn qabyldamaǵan jaǵdaida Ulttyq banktiń aýmaqtyq filialyna ótinish jazý kerek. Bul týraly banktiń qolma-qol aqsha ainalysy departamentiniń basshysy Dinara Daýtova aitty, dep habarlaidy QazAqparat.
Onyń aitýynsha, Ulttyq bankke turǵyndar habarlasyp jatyr. Olar dúkender 1000 teńgeni qabyldamai jatqanyn aitqan.
«Bul kýpiýralardyń zańdy tólem quraly bolyp tabylatynyn esterińizge sala ketkim keledi. Olardy basqa da estelik banknottar sekildi bank operatsiialary men aýdarymdar kezinde jáne tólemniń kez kelgen túri boiynsha qabyldaýǵa mindetti. Mundai banknottardy qabyldaýdan bas tartqan jaǵdaida Ákimshilik quqyq buzýshylyq týraly kodekstiń 206-babyna sáikes ákimshilik jaýapkershilik qarastyrylǵan», - dedi Dinara Daýtova.
Sonymen qatar, ol mundai aqshany qabyldamaǵan jaǵdaida ne isteý kerek ekenin túsindirdi.
«Eger sizden bul banknottardy qabyldamasa, Ulttyq banktiń aýmaqtyq filialyna ótinish bildirýińiz qajet. Banknotty qabyldaýdan bas tartý faktisin beinejazbaǵa túsirýdi nemese jazbasha negizdeme talap etýdi usynamyz»,-dedi Ulttyq bank ókili.
Dinara Daýtova ainalymda «Kúltegin» banknotynan basqa ataýly kúnder men oqiǵalarǵa arnalǵan estelik banknottar baryn atap ótti.
Olar da zańdy tólem quraly.
«Olardy ekinshi deńgeili banktar men «Qazposhta» AQ-tyń barlyq bólimshesinde, Ulttyq banktiń filialdarynda aýystyrýǵa jáne aiyrbastaýǵa bolady. Atalǵan banknottar tozǵan kezde ainalymnan alynady», - dedi Dinara Daýtova.
Estelik banknottardyń tolyq tizimi, sondai-aq Ulttyq Bank filialdarynyń mekenjaiy men bailanys derekteri týraly aqparat QUB saitynda ornalasqan.
