Biylǵy 4 aida teńgedegi depozitter 5,8 paiyzǵa ósti. Bul týraly Parlament Senatynyń jalpy otyrysynda QR Ulttyq banki tóraǵasynyń orynbasary Oleg Smoliakov málim etti, dep habarlaidy QazAqparat tilshisi.
«Shetel valiýtasyndaǵy salymdardy teńge salymdaryna aýystyrý úrdisi jalǵasýda. Teńgedegi depozitter ótken jyly 4,5 paiyzǵa, al aǵymdaǵy jyldyń 4 aiynda taǵy da 10,1 trln teńgege deiin, iaǵni 5,8 paiyzǵa ósti. Nátijesinde, depozitterdiń jalpy kólemi 17,1 trln teńgege jetti, al depozitterdiń dollarlanýy 2019 jylǵy sáýirdiń qorytyndysy boiynsha 41 paiyzǵa deiin tómendedi», - dedi Qazaqstan Ulttyq banki tóraǵasynyń orynbasary.
O. Smoliakovtyń aitýynsha, elimizdiń bank sektorynda aitýly ózgerister bolýda. Jumys istemeitin qaryzdardyń kólemi 20 paiyzǵa jýyq tómendedi. Aǵymdaǵy jyly bank sektoryn saýyqtyrý protsesi jalǵasady.
Bul rette ol jańa kreditter berý ótken jyldyń osyndai kezeńimen salystyrǵanda, biylǵy 4 aida 10,3 paiyzǵa ulǵaiǵanyn atap ótti.
Sondai-aq, Smoliakov infliatsiianyń turaqtanýy Ulttyq bankke bazalyq stavkany tómendetýge múmkindik bergenin aitty.
«Qazaqstan Ulttyq bankiniń aqsha-kredit saiasaty infliatsiialyq targetteý rejiminde júrgiziledi. Ulttyq banktiń negizgi maqsaty baǵa turaqtylyǵyn qamtamasyz etý bolyp tabylady. 2018 jyly infliatsiia birtindep tómendep, 5-7 paiyz nysanaly dáliz ishinde qalyptasyp, jyl qorytyndysy boiynsha 5,3 paiyzdy qurady. 2019 jylǵy mamyrdyń qorytyndysy boiynsha jyldyq infliatsiia da 5,3 paiyz deńgeide qalyptasty. Infliatsiianyń turaqtanýy Ulttyq bankke bazalyq stavkany tómendetýge múmkindik berdi. 2018 jyly ol birtindep 10,25 paiyzdan 9,25 paiyzǵa deiin tómendetildi. Aǵymdaǵy jylǵy sáýirde ol 9 paiyzǵa deiin tómendetildi. Tutastai alǵanda, aqsha-kredit saiasatynyń sipatyn infliatsiia boiynsha maqsattarǵa qol jetkizýge de, ornyqty ári ekonomikanyń infliatsiiasyz ósýine járdemdesýge yqpal etetin beitarap infliatsiia retinde sipattaýǵa bolady», - dep habarlady O. Smoliakov.
Ol teńgeniń erkin ózgermeli aiyrbastaý baǵamy valiýta saiasatyn júrgizý rejimi bolyp qalyp otyrǵanyn qosa aitty.
«Baǵam munai baǵasy jáne iri saýda áriptes elder valiýtalarynyń baǵamdary siiaqty irgeli faktorlardyń, sondai-aq ishki faktorlar men maýsymdylyqtyń áserinen qalyptasýy múmkin», - dep túsindirdi UB basshysynyń orynbasary.
Sonymen birge, ol elimizdiń tólem balansyna qatysty ahýal jaqsarǵany týraly aitty.
«Aǵymdaǵy shot 2 toqsan qatarynan profitsitpen qalyptasyp otyr. Máselen, aldyn ala baǵalaý boiynsha 2019 jylǵy 1-toqsanda aǵymdaǵy operatsiialar shotynyń profitsiti saýda balansynyń 14,4%-ǵa, iaǵni 7,1 mlrd AQSh dollaryna deiin ulǵaiýy nátijesinde 0,8 mlrd AQSh dollaryn qurady. Eldiń syrtqy boryshy tómendeýde», - dedi Smoliakov.
