Bangladeshtiń Koks-Bazar qalasynda bosqyndar lagerinde bolǵan iri órt saldarynan qonys aýdaryp kelgen 45 myń rohindjalyq baspanasyz qaldy. Tilsiz jaý lager aýmaǵyndaǵy eń iri klinikany joidy. Bul týraly BUU Jańalyqtary ortalyǵy habarlady.
Qaza bolǵandardyń naqty sany ázirge belgisiz. Aldyn ala málimet boiynsha, órt 15 adamnyń ómirin qidy, 400 adamnyń jaǵdaiy týraly áli belgisiz. Lagerdiń 560 turǵyny jaraqat aldy.
Koks-Bazarǵa zardap shekkenderge kómek kórsetý úshin birneshe jedel járjem kóligi jáne mobildi klinikalar jiberildi. Bosqyndarmen sondai-aq psihologtar jumys isteýde.
Gýmanitarlyq uiymdardyń qyzmetkerleri baspanasyz qalǵandarǵa kómek kórsetýde.
Osy ýaqytqa deiin lagerge 3 myń jyly kórpe, kún batareiasymen jumys isteitin 14,5 myń lampa, 11,5 myń moskitti tor, sondai-aq 1 myń litr aýyzsý jetkizildi.
Jalynnyń shyǵý sebebi áli belgisiz, tergeý jalǵasýda.
Koks-Bazar qalasyndaǵy lager - bosqyndardyń álemdegi eń úlken qonysy. Onda rohindja musylmandarynyń 870 myń ókili pana tapty. Olardyń deni – 720 myńǵa jýyq adam kórshi Mianme elindegi zorlyq-zombylyqtan qashyp, lagerge 2017 jyly keldi.
