Senat tóraǵasy Dariǵa Nazarbaeva balyq sharýashylyǵy salasynyń ókilderimen jumys babynda kezdesti, dep habarlaidy "Ult aqparat" Senattyń baspasóz qyzmetine silteme jasap.
Qazaqstan Respýblikasy Parlamenti Senatynyń tóraǵasy Dariǵa Nazarbaeva parlamenttik tyńdaýǵa daiyndyq aiasynda balyq sharýashylyǵy salasynyń ókilderimen jumys babynda kezdesý ótkizdi.
Kezdesýde «Qazaq balyq sharýashylyǵy» ZTB atqarýshy direktorynyń mindetin atqarýshy Serik Temirhanov balyq ósirýmen ainalysatyn kásipkerler men fermerlerdiń negizgi máselelerine nazar aýdardy. Olardyń qatarynda balyq ónimderi ainalymynyń esepke alynbaǵan kóleminiń aýqymy, shikizat tapshylyǵy, sýda ósirýdi damytý deńgeiiniń tómendigi, eksport aiasynyń tarlyǵy, ǵylymi-zertteý institýttarynyń saladaǵy ózekti máselelerden alshaqtyqtyǵy bar.
S.Temirhanov aýyl sharýashylyǵy ministrligi tarapynan salany ákimshilendirýdiń jetispeýshiligine nazar aýdardy, onyń aitýynsha, «elimizdiń aýyl sharýashylyǵy indýstriiasyndaǵy balyq sharýashylyǵynyń róli týraly túsinik álsiz bolyp otyr».
Sala ókilderiniń baǵalaýynsha, balyq ónimderi ainalymynyń 70 paiyzy zańdy bazardan syrt qalyp, «kóleńkeli sektordan» oryn alǵan. S.Temirhanov balyq pen balyq ónimderin sharýashylyqtardan dúken sórelerine deiin qadaǵalaý júiesin engizý jaǵdaidy jaqsarta alar edi dep esepteidi.
Senat tóraǵasy D.Nazarbaeva jumys kezdesýleriniń qorytyndysy boiynsha Agrarlyq máseleler, tabiǵatty paidalaný jáne aýyldyq aýmaqtardy damytý komitetine aýyl sharýashylyǵy ónimderin óndirýshilerdiń ókilderi kótergen ózekti máselelerdi zerdeleýdi jáne olardy 2020 jylǵa josparlanǵan parlamenttik tyńdaýda talqylaýǵa daiyndaýdy tapsyrdy.
