Qaraǵandy oblysynyń Balqash qalalyq sotynda politsiia bóliminiń tórt qyzmetkerine qatysty qylmystyq is qaraldy. Burynǵy tártip saqshylaryna ustalǵan adamnyń densaýlyǵyna aýyr ziian keltirdi degen aiyp taǵyldy, dep habarlaidy QazAqparat.
Tórt politseige kúdiktiniń densaýlyǵyna aýyr ziian keltirdi degen aiyp taǵyldy. Balqashtyń 44 jastaǵy turǵyny pedofiliia kúdigimen ustalǵan.
Tergeý materialdary boiynsha 2019 jylǵy 30 qazanda politsiia bóliminiń ǵimaratynda bolǵan tórt politsei aiyptalýshydan onyń qylmys jasaǵanyn moiyndatý maqsatynda erekshe qatygezdikpen, qorlaýmen, sondai-aq jábirlenýshini gaztutqysh pen taiaqshany paidalana otyryp, azaptaǵany jáne tunshyqtyrǵany belgili boldy.
Dene jaraqatyn alǵan soń jábirlenýshi shuǵyl túrde Balqash qalasynyń ortalyq aýrýhanasyna jetkizilip, onda oǵan ota jasaldy.
Sottalýshylardyń kinási jábirlenýshiniń aiǵaqtarymen, tergeý áreketteriniń hattamasymen, saraptama qorytyndysymen jáne basqa da aiǵaqtarmen dáleldendi.
Prokýror sottalýshylardy kináli dep tanýdy jáne olardy 10, 9 jáne 8 jylǵa bas bostandyǵynan aiyrýdy suraǵan bolatyn.
Alaida, qorǵaýshy tarap sottalýshylardy olardyń áreketinde qylmys quramynyń bolmaýyna bailanysty aqtaýdy surady.
«Jasalǵan qylmystyń sipaty men qoǵamdyq qaýiptiligin, sottalýshylardyń qoǵam úshin joǵary qaýiptiligin, qylmystyq jaýaptylyq pen jazany aýyrlatatyn mán-jailardyń bolýyn, jábirlenýshiniń qatań jaza taǵaiyndaý týraly pikirin, sondai-aq sottalýshylardyń qylmys jasaǵannan keiingi minez-qulqyn eskere otyryp, sot sottalýshylardy qylmystyq-atqarý júiesi mekemesinde jazasyn ótei otyryp, 3 jyl merzimge memlekettik qyzmette qyzmet atqarý quqyǵynan aiyra otyryp, 10 jáne 9 jyldan bas bostandyǵynan aiyrýdy taǵaiyndady. Sonymen qatar, sot sottalýshylardy arnaiy ataqtardan aiyrdy. Eki sottalýshyǵa basqalaryna qaraǵanda qatań jaza taǵaiyndaýy olardyń jábirlenýshige fizikalyq azap keltirýdegi belsendi róline bailanysty boldy», - dep habarlady Balqash qalalyq sotynyń baspasóz qyzmeti.
Úkim áli zańdy kúshine engen joq.
