Qazaqstanda jańa iPhone modeline qyzyǵýshylyq tanytqan azamattardy aldaýǵa baǵyttalǵan jańa shema paida boldy. Bas prokýratýranyń Quqyqtyq statistika jáne arnaiy esepke alý jónindegi komiteti iPhone 18-ge aldyn ala tapsyrys berý nemese odan bas tartý syltaýymen keletin kúmándi habarlamalardan saq bolýǵa shaqyrdy, dep habarlaidy ult.kz.
Alaiaqtar Apple atynan jalǵan habarlama jiberip, azamattardy bóten saittarǵa nemese telefon nómirlerine baǵyttaidy.
Bir shema boiynsha adamǵa onyń atyna iPhone 18-ge tapsyrys berilgeni týraly habarlama keledi. Tapsyrystan bas tartý úshin kórsetilgen «qoldaý qyzmetine» qońyraý shalý usynylady. Alaida nómir alaiaqtarǵa tiesili bolýy múmkin. Olar jeke jáne banktik derekterdi alýǵa tyrysady.
Ekinshi jaǵdaida smartfondy arzan baǵamen brondaý nemese jyldam jetkizý usynylady. Habarlamadaǵy silteme jalǵan saitqa aparyp, onda bank kartasynyń nómiri, CVV-kod, qupiia sóz nemese SMS arqyly kelgen rastaý kody suralýy múmkin.
Quqyq qorǵaý organdary kúmándi siltemelerdi ashpaýǵa, beitanys nómirlerge qońyraý shalmaýǵa jáne bank derekteri men SMS-kodtardy eshkimge bermeýge keńes beredi.
Sondai-aq beitanys adamdardyń ótinishi boiynsha qosymsha ornatpaý jáne qurylǵyǵa qashyqtan kirýge ruqsat bermeý qajet. Taýar satyp alarda satýshynyń senimdiligin tekserip, aqparatty kompaniianyń resmi saity nemese qosymshasy arqyly anyqtaǵan jón.
Eger bank kartasynyń derekteri alaiaqtarǵa berilip qoisa nemese shottan kúmándi aqsha esepten shyǵarylsa, bankke dereý habarlasyp, kartany buǵattap, politsiiaǵa júginý kerek.
Mamandardyń aitýynsha, kútpegen habarlama, asyqtyrý, «tiimdi usynys» nemese shuǵyl túrde kod pen bank derekterin talap etý — alaiaqtyqtyń negizgi belgileriniń biri.
