Almatyda Q.I. Sátbaev atyndaǵy Qazaq ulttyq tehnikalyq zertteý ýniversitetiniń (Satbayev University) prorektory Erjan Kúldeev sybailas jemqorlyq qylmysyn jasady degen kúdikpen ustaldy, dep habarlaidy ult.kz.
Bul týraly Kazachkov offside málimet taratty. Jýrnalistiń jazýynsha, Erjan Kúldeev 7 qyrkúiekte qylmystyq is boiynsha kúdikti dep tanylǵan. Onyń áreketi aldyn ala para berý baby boiynsha saralanǵan.
Isti Ulttyq qaýipsizdik komitetiniń Sybailas jemqorlyqqa qarsy is-qimyl qyzmeti tergep jatyr. Tergeý barysynda qylmystyq istiń ózge de baptarmen tolyqtyrylýy múmkin ekeni aityldy.
Erjan Kúldeev – Satbayev University-diń ǵylym jáne korporativtik damý jónindegi prorektory, basqarma múshesi. Ýniversitettiń resmi málimetinshe, ol tehnika ǵylymdarynyń kandidaty, professor, akademik jáne ál-Farabi atyndaǵy Qazaqstannyń ǵylym men tehnika salasyndaǵy Memlekettik syilyǵynyń laýreaty.
Biyl sáýirde ǵylym salasyndaǵy jetistikteri men joǵary bilim berýdi damytýǵa qosqan úlesi úshin «Qurmet» ordenimen marapattalǵan.
Kúldeevtiń ýniversitettegi eńbek joly 1995 jyly oqytýshy qyzmetinen bastalǵan. Keiin kafedra meńgerýshisi, prorektor jáne basqarma múshesi qyzmetterin atqarǵan.
