Qyzylorda oblysy Jańaqorǵan aýdanynda bir azamatsha jergilikti turǵynǵa bal ashyp, jolyn jeńildetip beretinin aityp san soqtyryp ketken. Jábirlenýshige keltirilgen shyǵyn 8 mln 853 myń teńgeni quraidy, dep habarlaidy QazAqparat tilshisi.
Quqyq qorǵaý salasynyń mamandary halyqtyń balger men táýipterge aldanyp qalatynyn aitady. Qazir oblysta mundai derekter jii oryn alady. Solardyń biri Jańaqorǵan aýdanynda bolǵan osy oqiǵa. Ózin balger retinde kórsetken áiel jergilikti turǵynǵa «jolyńdy jeńildetip beremin, baiyp ketesiń», - degen jeleýmen birneshe márte aqsha alǵan. Atalmysh alaiaqtyq derek sotta qaralyp, kúdiktiniń kinási dáleldendi. Onyń 5 jylǵa bas bostandyǵy shekteldi.
Qazirgi tańda Qyzylorda oblysynda alaiaqtyq derekteri alańdatyp otyr. Ústimizdegi jyldyń 7 aiynda Qyzylorda oblysynda 418 alaiaqtyq qylmysy tirkeldi. Ol ótken jyldyń dál osy kezeńimen salystyrǵanda 3,2 paiyzǵa azaiǵan. Dese de tártip saqshylaryn ózgeniń menshigin alaiaqtyq jolmen ielený arqyly azamattardyń quqyna qol suǵý derekteri oryn alyp jatqanyn oilantady.
«Biylǵy 7 aida alaiaqtyq jasaǵany úshin 162 tulǵa ustaldy. Onyń ishinde 109-y áielder bolyp otyr. Ony ashýda birqatar qiyndyqtar kezdesedi. Atap aitqanda, jábirlenýshiler kesh aryzdanyp jatady. Biyl osyndai 26 azamat kesh aryzdanǵan. Olardyń arasynda 2-3 jyldan keiin politsiiaǵa aryzdanyp kelgenderi bar. Shyndyǵyn aitqanda, keibir azamattar qazir jeńil paida tabý nemese máseleni ońai sheshý joldaryn izdeitindigi ras. Sondai-aq, azamattardyń quqyqtyq saýattylyǵy tómen», - dedi oblystyq ishki ister departamenti baspasóz qyzmetiniń basshysy Gúljahan Qaiyrbergenova.
Kóp jaǵdaida alaiaqtar jer, úi alyp beremin degen ýádesin beredi. Sonymen qatar, jumysqa turǵyzamyn deitinder kezdesedi. Tártip saqshylary alaiaqtarǵa aldanbaýdyń jolyn izdep árbir iske saqtyqpen qaraýdyń durys ekenin eskertedi.
