Qaitys bolǵan almatylyq Zańǵar Orynbetovtyń qabirine iPhone pishinindegi eskertkish qoiyldy. Erekshe qulpytastyń sýretteri WhatsApp jelisinde taralyp jatyr. Qaza tapqan jigittiń anasy Sara Erjanovanyń aitýynsha, muny onyń kúieýi oilap tapqan. Zańǵardyń ákesi - dizainer, sodan ol iPhone pishindi eskertkishtiń eskizin salǵan. Aita keteiik, Zańǵar Orynbetov qurastyrýshy mamandyǵy boiynsha oqyp, Apple ókilderiniń shaqyrtýymen AQSh-ta jobalaryn tanystyryp júrgen, - dep habarlaidy kaz.tengrinews.kz tilshisi. Biraq ókinishke qarai, Zańǵar 2016 jyldyń kúzinde jol apatyna ushyrap, qaitys bolǵan edi.
Zańǵar Orynbetov AQSh-qa barmastan bir ai buryn Taldyqorǵandaǵy innovatsiialyq jobalar baiqaýyna qatysyp, 1,5 million teńge kóleminde grant utyp alǵan. Rasynda ol bul somany tolyq kólemde ala almady. Baiqaýdyń uiymdastyrýshylary oǵan Apple keńsesine barýyna ǵana aqsha bergen. Al qalǵan somany "Qazaqstanǵa qaityp kelgen soń beremiz" dep ýáde bergen. Biraq Qaraǵandydan úiine qaityp bara jatqan kezde Orynbetov ápkesimen birge jol apatyna ushyraidy. Ókinishke qarai, qazaqstandyq aqyldy pernetaqtany iOS-qa engizý ideiasy sol kúii júzege asyrylmady.
Qazir Orynbetovtyń dosy men ápkesi Zańǵardyń isin ári qarai jalǵastyrýǵa daiyn. Jigittiń anasy Sara Erjanova Tengrinews.kztilshisine bar máseleniń aqshaǵa tirelip turǵanyn aitty. Aita ketetin jait, Taldyqorǵandaǵy baiqaýdy Almaty oblysynyń ákimdigi ótkizgen. Biraq endi qaitys bolǵan jigittiń týystary qalǵan qarajatty ala almai otyr.
Zańǵar Orynbetov pen Apple basshysy Tim Kýk
"Meniń ulym Zańǵar aqyldy pernetaqtany oilap tapty, 1,5 million teńge kóleminde grant utyp aldy. Biraq ol tek 750 myń teńge aldy. Zańǵar sol aqshaǵa jobasyn Apple keńsesinde tanystyrý úshin Amerikaǵa bilet aldy. Kompaniianyń basshysy Tim Kýkpen de kezdesti. Sonda turatyn úiine aqsha tóledi. Keiin pernetaqtany testileýden ótkizý úshin jáne App Store júiesine engizgende eshqandai qatelik bolmas úshin Zańǵar AQSh-ta Macbook pen iPhone satyp aldy, - deidi Erjanova. - Sonyń barlyǵyn óz aqshamyzǵa satyp aldyq. Olar berýi tiis aqshanyń jartysyn kúzde alýymyz kerek bolatynbyz, alaida ol qaza tapty (...) Zańǵardyń jobasy daiyn, endi ony júzege asyrý kerek. Alaida iOS-tyń jańa nusqasy paida bolǵandyqtan, pernetaqtany qaita oilastyryp, qarap shyǵý kerek. Onymen qosa, biz qaryzymyzdy tóleýimiz kerek (...) Biraq ákimdiktegiler qalǵan aqshany tóleý máselesin komissiia sheshetinin aitty. Biraq munyń qalai bolatyny bizge túsiniksiz", - dedi jigittiń anasy.
Endi qaza tapqan jigittiń anasy baiqaý uiymdastyrýshylary granttyń qalǵan somasyn bermese de, ulynyń jobasyn tolyqtyryp, aiaqtaý úshin jáne ony App Store júiesine engizý úshin aqsha tappaqshy.
Al Almaty oblysy ákimdiginiń jastar saiasaty basqarmasyndaǵylar qazirgi ýaqytta bul máselemen komissiianyń ainalysyp jatqanyn aitty. Komissiia shyǵarǵan sheshim osy aptada belgili bolady eken.
"Bul áli naryqta joq aqyldy ári tolyqqandy qazaqstandyq pernetaqta, iaǵni, mundai pernetaqtanyń aǵylshyn jáne orys tilderindegi nusqalary bar da, qazaqshasy áli joq. Bul pernetaqtanyń aqyldy dep atalýynyń sebebi ol sizdiń ne jazǵyńyz kelip otyrǵanyn biledi jáne birden ketken qatelikterdi durystaidy", - degen edi Zańǵar Orynbetov.
Aita keteiik, Zańǵar Orynbetov Súleiman Demirel atyndaǵy ýniversitetti aiaqtap, oqytýshy kómekshisi qyzmetin atqarǵan. Zańǵardyń anasynyń aitýynsha, ulynyń alǵashqy kompiýteri 6-synypta paida bolǵan. Sol kezdiń ózinde-aq Zańǵar IT-qurastyrýshy bolamyn dep jáne ómirin jańa tehnologiialarmen bailanystyramyn dep sheshken eken.
