Jambyl oblysynyń qylmystyq ister jónindegi mamandandyrylǵan aýdanaralyq soty Qarataý qalasynda 8 jasar qyzdy óltirý isi boiynsha úkim shyǵardy, dep habarlaidy "Ult aqparat".
Qylmystyq is boiynsha aldyn ala tyńdaý Jambyl oblystyq Prokýratýra basqarmasynyń prokýrory, memlekettik aiyptaýshy Ǵani Qurmanovtyń, sottalýshy men jábirlenýshi advokattarynyń, sottalýshy men jábirlenýshiniń zańdy ókilderiniń qatysýymen ótti.
Kúdikti J. Baidildaev QR azamaty, Qarataý qalasynyń 37 jastaǵy turǵyny, esh jerde jumys istemeitin, úilengen, buǵan deiin «Urlyq» baby boiynsha isti bolǵan. Qylmystyq isti sotqa deiingi tergep-tekserý nátijeleri jeti tomdy qurady. Sottalýshy jynystyq zorlyq-zombylyqtyń eki epizody boiynsha aiyptaldy: QR QK-niń 121-babynyń 4-bóligi jáne 99-babynyń 2-bóligi (kámeletke tolmaǵanǵa qatysty kisi óltirý), sondai-aq 24-babynyń 3-bóligi, 120-babynyń 4-bóligi (2013 jylǵy oqiǵaǵa qatysty) boiynsha.
«Búgin Jambyl oblysynyń qylmystyq ister jónindegi mamandandyrylǵan aýdanaralyq sotynda 8 jasar Arýai Berikti óltirý isi boiynsha úkim jariialandy. Qylmysker ómir boiyna bas bostandyǵynan aiyrý jazasyna kesildi. Prokýratýranyń sottalýshyny ómir boiyna qamaý týraly talaby tolyq kólemde qanaǵattandyryldy. Úkim zańdy kúshine engen joq»,- dep habarlady Jambyl oblysy Prokýratýrasynyń baspasóz qyzmetinen.
Eske sala keteiik, aǵymdaǵy jyldyń 24 sáýirinde Talas aýdany Qarataý qalasynyń kámelettik jasqa tolmaǵan turǵyny joǵalyp ketken bolatyn. Kelesi kúni qala syrtynan joǵalǵan qyzdyń máiiti tabylyp, Politsiia departamenti qylmystyq isti «Kámeletke tolmaǵandy óltirý» babyna aýystyrdy. Asa aýyr qylmysty ashýǵa Ishki ister ministrliginiń, Jambyl oblysy Politsiia departamentiniń, prokýratýra jáne taǵy basqa kúsh qurylymdarynyń tájiribeli qyzmetkerleri jumyldyrylǵan bolatyn. Birneshe kúnnen keiin qylmysty jasady degen kúdikpen J. Baidildaev ustaldy.
