Balasy Siriiada kóz jumǵan qaraǵandylyq Botagóz Maqatova balasynyń bireýlerge aldanyp qalǵanyn aitty, dep habarlaidy QazAqparat tilshisi.
Botagóz Maqatova balasy tiri kezinde onymen skaip arqyly sóileskenin jetkizdi.
«Ulym menen keshirim suraýmen boldy. Ózi de jaǵdaidyń sol arnaǵa burylatynyn bilmegen ǵoi. Balamdy eske alǵan saiyn kózimnen jas, kóńilimnen zar tógiledi. Árine, týǵandaryn sol jaqtan kútip otyrǵandarmen ulymdy da kúter edim... Alaida ol endi qaityp kelmeidi. Qazir kelinim men nemerelerimdi ǵana tosyp otyrmyn», - dedi ol QR SIM-de ótken baspasóz máslihatynda.
Onyń aitýynsha, uly ol jaqqa soǵysýǵa barmaǵan.
«Olarǵa Islam memleketi qurylatyny, bári de Shariǵat zańymen retteletini týraly ýáde berilgen. Olar sol oimen ketip qaldy. Soǵysýǵa barmaǵan. Barǵan kezinde qaida, ne úshin tap bolǵanyn bir-aq bilgen. Álbette, óz otbasyn da qorǵaý kerek boldy. Sol kezde bálkim qolyna qarý alǵan da bolar. Bilmestikten, aldanyp ketkenin eskerý kerek. 2012 jyly ulym ketken kezde 6 ai habar bolǵan joq. Balammen sóilesken kezimde ulymnyń artynda myltyǵy bar adamdar turǵan. Odan keiin ózderi úirengesin be, aqyryndap, bailanysqa shyǵa bastady. Áý basta sóilesýge eshqandai múmkindik bolmap edi. Nemerelerimniń úlkeni - beste, kishisi - bir jarymda», - deidi ana.
Eske sala ketsek, buǵan deiin Botagóz Maqatova óziniń 2012 jyly Siriiaǵa ketip qalǵan uly jaily tereńirek aityp bergen bolatyn. Qazir qaraly ana Siriiadaǵy kelini men nemerelerin kútip otyr.
Keshe Memleket basshysy Nursultan Nazarbaev Siriiadan Qazaqstan azamattaryn evakýatsiialaý boiynsha gýmanitarlyq operatsiiaǵa bailanysty málimdeme jasaǵan bolatyn. Memleket basshysy atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan Qazaqstannyń 47 azamaty, sonyń ishinde 30 bala elge qaitaryldy.
Sonymen birge, búgingi baspasóz máslihatynda QR Syrtqy ister vitse-ministri Erjan Ashyqbaev «Jýsan» operatsiiasynan keiin de qaqtyǵys aimaqtarynda júrgen qazaqstandyqtardy Otanyna qaitarý jumystary jalǵasatynyn málim etken bolatyn.
