بالاسى سيرييادا كٶز جۇمعان قاراعاندىلىق بوتاگٶز ماقاتوۆا بالاسىنىڭ بٸرەۋلەرگە الدانىپ قالعانىن ايتتى, دەپ حابارلايدى قازاقپارات تٸلشٸسٸ.
بوتاگٶز ماقاتوۆا بالاسى تٸرٸ كەزٸندە ونىمەن سكايپ ارقىلى سٶيلەسكەنٸن جەتكٸزدٸ.
«ۇلىم مەنەن كەشٸرٸم سۇراۋمەن بولدى. ٶزٸ دە جاعدايدىڭ سول ارناعا بۇرىلاتىنىن بٸلمەگەن عوي. بالامدى ەسكە العان سايىن كٶزٸمنەن جاس, كٶڭٸلٸمنەن زار تٶگٸلەدٸ. ەرينە, تۋعاندارىن سول جاقتان كٷتٸپ وتىرعاندارمەن ۇلىمدى دا كٷتەر ەدٸم... الايدا ول ەندٸ قايتىپ كەلمەيدٸ. قازٸر كەلٸنٸم مەن نەمەرەلەرٸمدٸ عانا توسىپ وتىرمىن», - دەدٸ ول قر سٸم-دە ٶتكەن باسپاسٶز مەسليحاتىندا.
ونىڭ ايتۋىنشا, ۇلى ول جاققا سوعىسۋعا بارماعان.
«ولارعا يسلام مەملەكەتٸ قۇرىلاتىنى, بەرٸ دە شاريعات زاڭىمەن رەتتەلەتٸنٸ تۋرالى ۋەدە بەرٸلگەن. ولار سول ويمەن كەتٸپ قالدى. سوعىسۋعا بارماعان. بارعان كەزٸندە قايدا, نە ٷشٸن تاپ بولعانىن بٸر-اق بٸلگەن. ەلبەتتە, ٶز وتباسىن دا قورعاۋ كەرەك بولدى. سول كەزدە بەلكٸم قولىنا قارۋ العان دا بولار. بٸلمەستٸكتەن, الدانىپ كەتكەنٸن ەسكەرۋ كەرەك. 2012 جىلى ۇلىم كەتكەن كەزدە 6 اي حابار بولعان جوق. بالاممەن سٶيلەسكەن كەزٸمدە ۇلىمنىڭ ارتىندا مىلتىعى بار ادامدار تۇرعان. ودان كەيٸن ٶزدەرٸ ٷيرەنگەسٸن بە, اقىرىنداپ, بايلانىسقا شىعا باستادى. ەۋ باستا سٶيلەسۋگە ەشقانداي مٷمكٸندٸك بولماپ ەدٸ. نەمەرەلەرٸمنٸڭ ٷلكەنٸ - بەستە, كٸشٸسٸ - بٸر جارىمدا», - دەيدٸ انا.
ەسكە سالا كەتسەك, بۇعان دەيٸن بوتاگٶز ماقاتوۆا ٶزٸنٸڭ 2012 جىلى سيريياعا كەتٸپ قالعان ۇلى جايلى تەرەڭٸرەك ايتىپ بەرگەن بولاتىن. قازٸر قارالى انا سيريياداعى كەلٸنٸ مەن نەمەرەلەرٸن كٷتٸپ وتىر.
كەشە مەملەكەت باسشىسى نۇرسۇلتان نازارباەۆ سيرييادان قازاقستان ازاماتتارىن ەۆاكۋاتسييالاۋ بويىنشا گۋمانيتارلىق وپەراتسيياعا بايلانىستى مەلٸمدەمە جاساعان بولاتىن. مەملەكەت باسشىسى اتاپ ٶتكەندەي, 6 قاڭتاردا قۇقىق قورعاۋ ورگاندارى مەن سىرتقى ٸستەر مينيسترلٸگٸ جٷرگٸزگەن گۋمانيتارلىق شارا نەتيجەسٸندە سيرييادان قازاقستاننىڭ 47 ازاماتى, سونىڭ ٸشٸندە 30 بالا ەلگە قايتارىلدى.
سونىمەن بٸرگە, بٷگٸنگٸ باسپاسٶز مەسليحاتىندا قر سىرتقى ٸستەر ۆيتسە-مينيسترٸ ەرجان اشىقباەۆ «جۋسان» وپەراتسيياسىنان كەيٸن دە قاقتىعىس ايماقتارىندا جٷرگەن قازاقستاندىقتاردى وتانىنا قايتارۋ جۇمىستارى جالعاساتىنىن مەلٸم ەتكەن بولاتىن.
