QR Bas memlekettik sanitarlyq dáriger Aijan Esmaǵambetova balalarǵa ekpe saldyrý týraly óz otbasynyń tájiribesimen bólisti, dep habarlaidy QazAqparat,.
«Meniń eki balam bar. Olar keńestik kezde belgilengen kúntizbe boiynsha barlyq ekpeni alǵan. Ol kezde vaktsinadan bas tartý jóninde tipti oilamaitynbyz. Sol ekpeler úshin alǵys aitamyn. Sebebi túrli juqpaly aýrýlar shyqqanda meniń balalarym aýyrǵan joq. Qazir eki nemerem bar. Úlkeni – eki jasta, kishisi – bir jasta. Naǵyz mindetti 11 ekpeni alatyn jasta jáne barlyq vaktsinany alyp kele jatyr. Munda meni keremet vaktsinalar salǵyzdy dep oilamańyzdar. Ekeýi de turǵylyqty mekenjaiy boiynsha, Tegin meditsinalyq kómektiń kepildendirilgen kólemi aiasynda barlyq balalar alyp jatqan ekpelerdi salǵyzdy», - dedi bas sanitarlyq dáriger Facebook-te ótken onlain-brifingte.
Spikerdiń aitýynsha, vaktsina – balalardy epidemiiadan, juqpaly balalar aýrýynan qorǵaýdyń jalǵyz amaly.
«Biz umytyp ketken aýrýlar kóp jáne olar qaityp kelmestei kórinedi. Biraq, ujymdyq immýnitetimiz 90 paiyzdan túsip ketse, birden difteriia, sirespe aýrýlaryna qaita oralamyz. Onyń saldary aýyr bolyp, tipti balalar kóz jumýy da múmkin. Al balalardy qorǵaý múmkindigin memleket tegin berip otyrǵanda, ony paidalaný kerek», - dedi A. Esmaǵambetova.
