Foto: pexels.com
Balalary túngi serýenge shyǵýyna bailanysty 2500-den astam zańdy ókil jaýaptylyqqa tartyldy, dep habarlaidy Ult.kz.
"Politsiia qyzmetkerleri turaqty túrde profilaktikalyq reidtik is-sharalar júrgizip, kámeletke tolmaǵandar arasyndaǵy quqyq buzýshylyqtardy boldyrmaýǵa jáne olardyń túngi ýaqytta qaýipsizdigin qamtamasyz etýge baǵyttalǵan.
Reidter barysynda politseiler aýla aýmaqtaryn, saiabaqtardy, kompiýterlik klýbtardy, oiyn-saýyq oryndaryn jáne jastar kóp shoǵyrlanatyn basqa da oryndardy tekseredi.
Mysaly, iývenaldy politsiia qyzmetkerleri 15 jasar jasóspirimdi anyqtady, ol saǵat 23:00-den keiin Botanikalyq saiabaq aýmaǵynda zańdy ókiliniń qaraýynsyz júrgen. Osy fakt boiynsha zańdy ókilge QR ÁQBtK-nyń 442-babynyń 2-bóligine sáikes ákimshilik hattama toltyryldy.
Aǵymdaǵy jyldyń basynan beri atalǵan bap talaptaryn buzǵany úshin shamamen 2500 zańdy ókil ákimshilik jaýaptylyqqa tartyldy", delingen habarlamada.
QR zańnamasyna sáikes, kámeletke tolmaǵandarǵa saǵat 23:00-den 06:00-ge deiin zańdy ókiliniń qaraýynsyz úiden shyǵýǵa, sondai-aq túngi ýaqytta oiyn-saýyq oryndarynda eresektersiz bolýǵa tyiym salynatynyn eske salamyz.
