Aqmola oblysynyń Arshaly aýdanyndaǵy Volgodonovka aýylynda óz qarajatyna balalar oiyn alańyn salyp bergen kásipker sot sheshimimen 1,25 million teńge ótemaqy tóleýge mindetteldi, dep habarlaidy ult.kz.
Halyqstan Telegram arnasynyń málimetinshe, kásipker 2025 jyly aýyldaǵy bos jatqan jerdi abattandyryp, balalarǵa arnalǵan oiyn keshenin, átkenshekter men aǵashtan jasalǵan kúrke ornatqan. Alaida sol jyly alańda oinap júrgen kishkentai qyz syrǵanaqtan qulap, basynan jaraqat alǵan.
Osydan keiin balanyń anasy sotqa júginip, oiyn alańy qaýipsizdik talaptaryna tolyq sáikes kelmegenin alǵa tartqan. Onyń aitýynsha, syrǵanaqtyń ainalasynda arnaiy qaýipsizdik jabyny bolmaǵan.
Bir jylǵa jýyq qaralǵan istiń qorytyndysynda sot talap-aryzdy qanaǵattandyryp, kásipkerge zardap shekken balanyń otbasyna materialdyq jáne moraldyq shyǵyn úshin jalpy 1,25 million teńge ótemaqy tóleý jóninde sheshim shyǵardy.
Kásipker bul sheshimmen kelispeitinin aitqanymen, sot úkimin oryndaitynyn jetkizdi.
– Bala oiyn alańynda eresekterdiń qaraýynsyz júrgen. Al syrǵanaq qaýipsizdik talaptaryna sai arnaiy plastikten jasalǵan bolatyn, – deidi ol.
Oqiǵadan keiin kásipker oiyn alańyn tolyqtai buzyp tastaǵan. Onyń aitýynsha, oiyn qurylǵylary men aǵash kúrke kórshi aýdanǵa berilgen, al alań ornalasqan jer burynǵy qalpyna keltirilgen.
Bul jaǵdai áleýmettik jelilerde qyzý talqylanyp, kópshilik kásipkerdi qoldap, ótemaqy somasyn jinap berýdi usyndy. Alaida ol qarjylai kómekten bas tartyp, sot sheshimin óz qarajatymen oryndaitynyn málimdedi.
Kásipkerdiń sózinshe, balalar igiligi úshin salynǵan oiyn alańyn buzý ońaiǵa soqpaǵan. Degenmen osy oqiǵadan keiin mundai jaýapkershilikti qaita moinyna alýǵa daiyn emes ekenin aitty.
