Elimizde balalardyń qaýipsizdigin qamtamasyz etýge arnalǵan jańa elektrondy qurylǵy tanystyryldy, dep habarlaidy QazAqparat.
«Balalardyń qaýipsizdigi úshin arnaiy elektrondy qurylǵyny iske qosqaly jatyrmyz. Bul kishkentai ǵana qurylǵyny balanyń kiimine nemese sómkesine jabystyryp qoiýǵa bolady. Ol Bluetooth arqyly jumys isteidi. Qazir kez kelgen uialy telefonda Bluetooth júiesi bar. Iaǵni bala úiden nemese ata-anasynan 10 metr qashyqtaǵan sátten bastap, elektrondy qurylǵy avtomatty túrde iske qosylady. Sondai-aq, elektrondy qurylǵy arqyly balanyń qai jerde júrgenin nemese oǵan qaýip tóngen jaǵdaida ornalasqan jerin anyqtaýǵa bolady», - dedi QR Ishki ister ministriniń orynbasary Sáken Sársenov qurylǵyny tanystyrý barysynda.
Vitse-ministrdiń aitýynsha, atalǵan elektrondy qurylǵyny qoldaný ár ata-ananyń erkinde bolady.
«Odan bólek bul qurylǵyda «SOS» batyrmasy bar. Iaǵni bala qaýip tóngen jaǵdaida sol batyrmany bassa, sol sátte dabyl politsiia men qatar onyń ata-anasyna kelip túsedi. Sáikesinshe dabyl boiynsha politsiia jedel áreket etedi. Ata-ana men politsiia balany arnaiy mobildi qosymsha arqyly baqylai alady. Elektrondy qurylǵynyń quny ortasha baǵamen 2500 teńgeni quraidy», - dedi ol.
Aita keteiik, búgin elordada BAQ ókilderine QR Ishki ister ministrliginde tsifrlandyrý salasyna qatysty birqatar jobalar tanystyryldy.
