Aqparat jáne qoǵamdyq damý vitse-ministri Daniiar Qadyrov balalardy kiberbýllingten qorǵaý týraly zań jobasyndaǵy áleýmettik jelilerdiń resmi ókildigi jaiyndaǵy normany túsindirdi, dep habarlaidy QazAqparat.
«Qazir bizde Facebook, Instagram, Tik-Tok, VKontakte siiaqty úlken halyqaralyq internet-resýrstarmen jumys júrip jatyr – barlyǵy túsinistik tanytyp, kelisim berip otyr. Úlken halyqaralyq internet-resýrstar balany kiberbýllingten qorǵaý qajettigin jaqsy túsinedi. Iri jelilerdiń de óz qaýipsizdik qyzmetteri bar, olar muny qadaǵalap otyrady», - dedi Daniiar Qadyrov Senattyń jalpy otyrysynan keiin tilshilerge bergen suhbatynda.
Ministrlik ókili bul zań jobasynda repressivti ádister joq ekenin atap ótti.
«Zań kúshine engen soń, alty aiǵa deiin ýaqyt beriledi. Ózderińiz biletindei, telearnalardyń da ókildikteri bar. Bul da qoǵamdyq rezonans boldy, biraq birde-bir telearna jabylmady, barlyǵy jumys istep tur. Eger Qazaqstan zańdaryn buzbasa, birde-bir áleýmettik jeli buǵattalmaidy. Bul tek osy Zań jobasymen ǵana rettelmeidi – BAQ týraly Zań, Bailanys týraly zań bar. Jelini múldem jabý týraly eshteńe aitylyp otyrǵan joq», - dedi Qadyrov.
Eske sala ketsek, búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaitaryldy.
