Úkimet úiinde ótken keńes barysynda Premer-Ministr Álihan Smaiylov «Jaily mektep» ulttyq jobasyn iske asyrý jóninde tapsyrma berdi, dep habarlaidy "Ult aqparat" primeminister.kz portalyna silteme jasap.
Premer Memleket basshysy Reformalar jónindegi Joǵary keńestiń otyrysynda «Jaily mektep» ulttyq jobasynyń negizgi tásilderin maquldaǵanyn, onyń sheńberinde 800 myń oqýshyǵa arnalǵan jańa formattaǵy mektepter salý josparlanǵanyn eske saldy.
«Ulttyq jobany iske asyrýǵa jedel kirisýimiz kerek. Alaida búginde óńirlerdegi 143 mekteptiń jer ýchaskelerin anyqtaý boiynsha suraqtar sheshilmegen. Bul jumysty barynsha tezdetý qajet: qazan aiynyń sońyna deiin qurylysy 2023 jyly jáne jyl sońyna deiin 2024 jylǵa josparlanǵan mektepter boiynsha máseleni sheshý kerek», — dedi Álihan Smaiylov.
Sondai-aq ol oqý protsesin tsifrlandyrýdy tezdetý qajettigin atap ótti.
«Osyǵan bailanysty oqýlyqtardy tsifrlyq formatqa kóshirýdi jedeldetý jáne balalardy aýyr sómkelerden aryltý qajet. Sondai-aq ákimdiktermen birlesip, oqýshylardy planshettermen qamtamasyz etý máselesin sheshýdi qolǵa alý kerek. Atap aitqanda, “Qazaqstan halqyna” qorymen birlesip, olardy aýyldyq mektepterdiń balalary úshin satyp alý múmkindigin pysyqtaý kerek», — dep atap ótti Álihan Smaiylov.
Keńes sońynda ol Tsifrlyq damý, innovatsiialar jáne aeroǵarysh ónerkásibi ministrligine bailanys operatorlarymen birlesip, elimizdiń barlyq mektepterin sapaly jyldamdyǵy joǵary internetpen qamtamasyz etýdi tapsyrdy.
