Telegram-arnada balalardy asyrap alady degen jeleýmen shetel azamattaryna satyp jatqany týraly aqparat tarady. Oǵan "balalardyń baǵasy" kórsetilgen maqalaǵa silteme tirkelgen. Bul aqparat - feik, - dep habarlaidy stopfake.kz.
Taratylǵan maqala 2017 jyly jazylǵanyn jáne onda keltirilgen halyqaralyq bala asyrap alý agenttikteriniń tizimi búginde eskirgenin atap ótken jón. Avtor kórsetken uiymdardyń eshqaisysy qazirgi kezde Qazaqstan Respýblikasyndaǵy Bala asyrap alý jónindegi sheteldik agenttikter ókildikteriniń tizbesine kirmeidi.
Maqalada kórsetilgen «balalardyń baǵalaryna» kelsek, bul somalar – ushý, turý, tamaqtaný, qujattardy rásimdeý, aýdarmashylar qyzmeti jáne t.b. shyǵyndar ekeni kórinip tur, bul – balalardyń quny emes.
Bala asyrap alý máselelerine jetekshilik etetin QR Bilim jáne ǵylym ministrligi qazaqstandyq jetim balalarǵa belgilengen baǵa týraly qaýesetti joqqa shyǵardy.
«Joq, bul aqparat shyndyqqa janaspaidy. Balany sheteldik asyrap alý rásimi óz qyzmetinen kez kelgen qarjylyq nemese basqa da paida alýǵa tyiym salynǵan, akkredittelgen kommertsiialyq emes agenttikter arqyly ǵana júzege asyrylady. QR azamattaryn asyrap alý jónindegi qyzmetti júzege asyratyn agenttikterdi akkreditteý tártibi Kodekspen reglamenttelgen», – dep túsindirdi vedomstvonyń baspasóz hatshysy Móldir Ábdýálieva.
Sondai-aq, ministrlik halyqaralyq bala asyrap alýdyń balalar saýdasyna eshqandai qatysy joq ekenin habarlady.
«Balany sheteldik asyrap alý rásimi balalardy qorǵaý jáne balany sheteldik asyrap alýǵa qatysty yntymaqtastyq týraly konventsiiaǵa, «Neke (erli – zaiyptylyq) jáne otbasy týraly» QR Kodeksine (budan ári-Kodeks) jáne 2012 jylǵy 30 naýryzdaǵy № 380 QR ÓP bekitken Qazaqstan Respýblikasynyń azamattary bolyp tabylatyn balalardy asyrap alýǵa berý qaǵidalaryna sáikes júzege asyrylady», – delingen vedomstvo jaýabynda.
Sondai-aq, baspasóz qyzmetiniń ókilderi sheteldikter qataryndaǵy asyrap alýshy ata-analarǵa úmitkerler Qazaqstan Respýblikasynyń «Neke jáne otbasy týraly» Kodeksiniń 91-babynyń barlyq talabyna sai kelýine mindetti túrde tekseristen ótýi tiis ekenin atap ótti.
«Balany sheteldik bala asyrap alý rásiminiń ashyqtyǵyn qamtamasyz etý jáne sybailas jemqorlyq táýekelderin boldyrmaý maqsatynda buiryqpen balany sheteldik asyrap alýǵa jatatyn, Qazaqstan Respýblikasynyń azamattary bolyp tabylatyn jetim balalar men ata-anasynyń qamqorlyǵynsyz qalǵan balalardy asyrap alýǵa niet bildirgen sheteldik azamattardyń qujattaryn qaraý jónindegi komissiianyń erejesi (BǴM 3.03.2020 j. № 80 buiryǵy) bekitildi. Balany sheteldik asyrap alýshylardyń usynylǵan qujattarynyń qoldanystaǵy zańnama talaptaryna sáikestigin tekserý qorytyndylary boiynsha bala asyrap alý rásiminen bas tartý ne ony jalǵastyrý týraly alqaly sheshim qabyldanady», - dedi ministrlik ókili.
Demek, qazaqstandyq balalardy asyrap alýdy jeleý etip, sheteldikterge satatyny týraly taraǵan aqparat – feik.
