Foto: "Habar" telearnasy siýjetiniń kadry
Aqtóbe oblysynda 659 otbasy 20 jyl buryn apatty dep tanylǵan úilerde turyp jatyr. Ótken ǵasyrdyń orta tusynda salynǵan ǵimarattardyń qabyrǵasy sógilip, irgetasy shógip barady. Turǵyndar shatyry ortasyna túsip, jazataiym bolamyz ba dep qaýiptenedi. Bul týraly "Habar" arnasynyń siýjetinde aitylady.
Zeinettegi qala turǵyny Qaniia Ajǵulova ekiqabatty baspananyń páter etip jaraqtaǵan jertólesin panalaýǵa májbúr. Bul ǵimaratta mundai úidiń birnesheýi bar eken.
20 jyl buryn apatty dep tanylǵan nysannyń qabyrǵasy sógilip, shatyry tesilgen. Jylytý júiesi de eskirgendikten turǵyndardyń deni syz ótip, syrqatty bolǵan.
"Balalar aýyryp, kelinim de aýyryp, balalar – astma. Bir úlken balam 16-daǵy myna murnymen demala almaidy. Endi mine, men aýrý bolyp otyrmyn. Endi ne isteimiz? Biyl qysty kótere almaimyz bizder. Myna batareidi qamyt kigizip otyrmyz jan-jaqtan bárimiz de", - deidi telearna tilshisine bergen suhbatynda jergilikti turǵyn.
Jergilikti bilik bul máseleni sheshý úshin investorlarǵa iek artqan. 3 jyl buryn qurylys kompaniiasymen memorandýmǵa qol qoiypty. Memleket qorynan jer telimin berip, merdiger kópqabatty baspana turǵyzýǵa tiis bolatyn. Jańa ǵimarattaǵy 58 páter apatty úi turǵyndaryna úlestirilýi kerek. Alaida qurylys toqtap qalǵan.
"Qyrkúiek aiynda osy úidiń qabyrǵasyn kóteremiz dep ýáde etken. Endi alaida ózderiniń qarajattarynyń tapshylyǵyna sáikes qarasha aiyna deiin ýaqyt surap otyr. Eger osy qarasha aiyna deiin óz jumystaryn bastamaǵan jaǵdaida qala ákimdigi berilgen osy 8 gektardy qaitadan qala qoryna alady. Jáne de basqa investor kompaniialarmen qazir kelissózder júrgizilip jatyr. Sol kompaniiaǵa beriledi", - deidi qalalyq turǵyn úi inspektsiiasy bóliminiń basshysy Aqnur Qazbaeva.
Qala ákimdigi apatty ǵimarat turǵyndaryna baspana qunyn óteýdi de usynyp otyr. Máselen, Tynyshpaev kóshesindegi myna úidegi 8 páterdi satyp alýǵa biýdjetten 40 mln teńge bólingen.
