Britan sarapshylary álemdegi kóptegen balalardyń aiaq astynan baýyr aýrýyna shaldyǵý sebebin anyqtady, dep habarlaidy QazAqparat VVS aqparat agenttigine silteme jasap.
Olar júrgizgen zertteý qorytyndysyna sáikes, Covid-19 pandemiiasy bastalǵaly gepatittiń keń taraǵan eki virýsyna shaldyǵý jaǵdailary sirek kezdesip, kóptegen elderde engizilgen qatań shekteý sharalary alynǵan soń oqshaýlaý kezinde álsiregen immýnitetke «shabýyl» jasap, balalar mekemelerinde belsendi tarala bastaǵan.
Virýs saldarynan 35 eldegi 1000-nan astam bala gepatitke shaldyqty. Naýqastardyń kóbi - bes jasqa tolmaǵan balalar.
Olardyń keibireýlerinde infektsiianyń aýyr bolǵany sonshalyq, balany qutqarýdyń jalǵyz joly – aýrýdan zardap shekken organnyń transplantatsiiasy boldy.
Ulybritaniianyń ózinde ǵana gepatitke shaldyqqan 12 balaǵa baýyr transplantatsiiasy otasy jasaldy.
London men Glazgodaǵy zertteýshilerdiń eki toby koronavirýs kezindegi shekteýlerge bailanysty eki jyl boiy qurdastarymen bailanysa almaǵan balalar keiinirek ádette náreste kezinde qalyptasatyn immýnitettiń bolmaýynan eki infektsiiaǵa tap bolǵan degen qorytyndyǵa keldi.
Salqyn tiiý men asqazannyń buzylýyn týdyratyn adenovirýs (AAV2) ádette aýrýdy ózdiginen týdyrmaidy, óitkeni onyń jasýshalarynyń kóbeiýi tek bir ýaqytta «kómekshi» adenovirýsty juqtyrǵan jaǵdaida ǵana paida bolady.
Ǵalymdardyń aitýynsha, bul keibir balalarda baýyr aýrýynyń nelikten asqynǵanyn túsindirip otyr.
