Bala týýmen bailanysty memqyzmetter bank qosymshalarynda qoljetimdi bolady. Bul týraly QR Eńbek jáne halyqty áleýmettik qorǵaý ministri Serik Shápkenov Úkimet otyrysynda málim etti, dep habarlaidy QazAqparat.
«Byltyr aǵymdaǵy biznes-protsesterge júrgizilgen taldaý nátijesinde memlekettik qyzmetterdiń damýyn tejeitin birqatar faktorlar anyqtaldy. Atap aitqanda, zeinetaqy men járdemaqy taǵaiyndaý úshin qajetti «tarihi» derekterdiń bolmaýy, mobildi azamattar bazasynda tirkeýdiń bolmaýy. Osyǵan bailanysty biz memlekettik qyzmet kórsetý úderisterin reinjiniring jáne transformatsiialaý boiynsha jumys júrgizýdemiz.
Búgingi kúni elektrondyq formatta 45 memlekettik qyzmettiń 42 túri nemese 93% usynylady, onyń ishinde 21 qyzmetti nemese 43% proaktivti túrde alýǵa bolady», - dedi Serik Shápkenov.
Onyń aitýyna qaraǵanda, 2021 jyly áleýmettik-eńbek salasynda barlyǵy 12,6 mln memlekettik qyzmet kórsetilgen. Onyń ishinde 9,1 mln nemese 72% qyzmet elektrondy túrde kórsetildi.
«Bul 2020 jylmen salystyrǵanda 12% artyq. 2025 jylǵa qarai biz barlyq memlekettik qyzmetterdi 100% elektrondy formatqa kóshirýdi josparladyq», – dedi Serik Shápkenov.
Sondai-aq, ministr, halyqtyń qyzmet alý múmkindikterin keńeitý úshin byltyr qazan aiynda eki bankpen birlesip, olardyń platformalarynda bala týýmen bailanysty memlekettik qyzmetter servisin iske qosqanyn atady.
«Tek 2021 jyldyń tórtinshi toqsanynda balalary bar 16,5 myńnan astam otbasy úide otyryp, ekinshi deńgeili baknterdiń mobildi qosymshalary arqyly qyzmet aldy. Osy praktikany basqa bankterdiń mobildi qosymshalary arqyly engizý jónindegi jumys jalǵasatyn bolady», - dedi Serik Shápkenov.
