Búgin Almaty ákimi Baqytjan Saǵyntaev Meditsina qyzmetkeri kúnimen quttyqtaý úshin qalanyń meditsina qaýymdastyǵymen onlain-kezdesý ótkizdi, dep habarlaidy "Ult aqparat".
«Gippokrat antyna adal aq halatty abzal jandar, Sizder ýaqyt synyna tótep bere bildińizder. Koronavirýspen kúreste sizderdiń janqiiarlyq eńbekterińiz úshin barsha almatylyqtardyń atynan alǵysymdy bildiremin. Adam saýlyǵynyń qorǵany bolyp júrgen bul mamandyq ieleriniń bedeline baǵa jetpeidi», — dedi Baqytjan Saǵyntaev.
Qala ákimi Almatynyń únemi damyǵan meditsina ortalyǵy bolǵandyǵyn basa kórsetti. Munda ǵylymi-zertteý institýttary jáne ortalyqtar, meditsinalyq bilim beretin uiymdar, qalalyq, respýblikalyq, vedomstvalyq, jeke klinikalar shoǵyrlanǵan, qalada 30 myńnan astam meditsina qyzmetkerleri eńbek etedi.
Jyl saiyn bul mereke qarsańynda kásibi baiqaýlar ótkiziledi. Biyl mamandyqtyń úzdigin anyqtaityn bul baiqaý 13 nominatsiia boiynsha ótti. Atap aitqanda, úzdik dáriger jáne medbike, úzdik infektsionist, emhana men jedel járdemniń úzdik dárigeri, sondai-aq úzdik júrgizýshi.
«Bul baiqaý Sizderdiń árqaisyńyzdyń eńbekterińizdiń barynsha mańyzdy ekenin kórsetedi. Barlyq jeńimpazdardy quttyqtaimyn», — dedi B. Saǵyntaev jáne koronavirýspen kúreste jankeshtilik tanytyp júrgen eki myńnan astam dárigerdiń eren eńbekterin erekshe baǵalady.
Qalaǵa sińirgen zor eńbekteri úshin bes meditsina qyzmetkeri «Eńbegi úshin» tósbelgisimen marapattaldy. Birqatar meditsina qyzmetkerleri qala ákiminiń alǵys hattaryn ielendi.
«Pandemiia bizdi kóp nársege úiretti. Ortaq kúsh-jigerimizben biz bul qiyndyqty da abyroimen eńseremiz, almatylyqtardyń densaýlyǵyn saqtaý men nyǵaitý jolynda bárimiz birigip, aianbai eńbek etemiz, men buǵan senimdimin», — dep atap ótti Almaty ákimi B. Saǵyntaev.
