Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysy barysynda elektr energiiasyna, kómirge, TKSh qyzmetterine baǵany tómendetý máselesi jáne Memleket basshysy Qaýipsizdik keńesiniń otyrysynda bergen tapsyrmalardy oryndaý aiasyndaǵy bailanysy qaraldy, dep habarlaidy "Ult aqparat".
Ministrlerdiń baiandamalaryn tyńdaǵan soń Premer-Ministr ótken ýaqytta Memleket basshysynyń tapsyrmasyn oryndaý boiynsha aýqymdy jumystar atqarylǵanyn atap ótti. 2019 jyldyń 1 qańtarynan bastap elektr energiiasynyń, gaz, jylý men sýdyń, kómirdiń, uialy bailanys pen Internettiń baǵasy tómendeidi. B.Saǵyntaev Memleket basshysynyń tapsyrmalary 1 qańtardan bastap oryndalýy kerektigin basa aitty.
Osyǵan bailanysty, oblystardyń, Astana, Almaty, Shymkent qalalarynyń ákimdikterine turǵyndar úshin kómirdiń qolaily baǵasyn qamtamasyz etý úshin óńirlik operatorlardyń úzdiksiz jáne sapaly jumysyn qamtamasyz etý tapsyryldy.
«Kómir baǵasy temirjol tuiyqtarynda tómendep jatyr. Al ary qarai kólikpen tasý, bul endi, jergilikti ákimderdiń jumysy. Iaǵni, qazir ol jumystar atqarylmaityn bolsa, onda kómir baǵasynyń 17-20 paiyzǵa deiin tómendeýi tasymaldaýmen ainalysatyn kásipkerlerdiń qaltasyna ketetin bolady. Tutynýshy baǵanyń eshqandai tómendeýin kórmeidi.
Úkimet, ministrlik óz jumysyn jasady. Negizgi kómir óndirýshilermen kelisimsharttar jasalyp, jumystyń bári aiaqtaldy. Endi, negizgi tutynýshylarǵa deiingi jumysty qolǵa alýdy suraimyz», - dedi ol oblys ákimderine qarata.
Sonymen qatar, Premer-Ministr birqatar óńirlerde jyldyń basynan beri qoqys shyǵarý tarifteriniń óskenine toqtaldy. Ol Shyǵys Qazaqstan oblysynda 30%-ǵa, Batys Qazaqstan oblysynda 46%-ǵa, Soltústik Qazaqstan oblysynda 50%-ǵa jáne Almaty qalasynda 40%-ǵa ósken. Jolaýshylar tasymaly boiynsha Aqtóbe oblysynda jolaqy baǵasy 30%-ǵa ósken.
Premer-Ministr B. Saǵyntaev óńirlerdiń ákimderine oblystyń kommýnaldyq qyzmetter tarifteriniń ósýine jol bermeýdi jáne olardy tómendetý boiynsha tiisti jumystar júrgizýdi tapsyrdy.
