Úkimet basshysy Baqytjan Saǵyntaev 2018 jyldyń I toqsanyndaǵy áleýmettik-ekonomikalyq damý kórsetkishterine baǵa berdi, dep habarlaidy QazAqparat.
«Derekterden kórip otyrǵandaryńyzdai, birinshi toqsannyń qorytyndysy boiynsha ósim 4,1 paiyzdy qurap otyr. Elbasy Úkimetke ekonomika ósimin qamtamasyz etý boiynsha joǵary nátijelerge qol jetkizý mindetterin qoiyp otyr. Sol sebepti bul tapsyrmalardy oryndaýda júieli sharalardy qabyldaýymyzdy qajet etedi. Bul - kúrdeli mindet. Degenmen, biz ai saiyn barlyq óńirler boiynsha ekonomikanyń ár salasy boiynsha tiisti ónimniń ósýin qamtamasyz etýimiz qajet. Bul - barshamyzdyń ortaq isimiz», - dedi Saǵyntaev búgingi Úkimet otyrysynda.
Aita ketsek, Úkimet otyrysynda QR Ulttyq ekonomika ministri Timýr Súleimenov 2018 jyldyń I toqsany boiynsha eldiń áleýmettik-ekonomikalyq damý kórsetkishteri jaily baiandama jasaǵan bolatyn. Ministr biylǵy jyldyń I toqsanynda el ekonomikasynda jaǵymdy úrdister saqtalǵanyn atap ótti.
«Eseptik kezeńde JIÓ ósýi 4,1 paiyzdy qurady. 2017 jyldyń sáikes kezeńinde JIÓ 3,6 paiyz bolǵan edi. Mundai serpin ónerkásiptiń, aýyl sharýashylyǵynyń, kórsetiletin qyzmetter salasynyń ósýimen bailanysty. Sondai-aq, jalpy ishki ónimniń ulǵaiýyna investitsiialardyń joǵarǵy ósimi men tómen infliatsiialyq protsester septigin tigizýde. Infliatsiia jyl basynan beri 1,8 paiyzdy qurady. Bul 2017 jyldyń sáikes kezeńi boiynsha 0,5 paiyzǵa tómen. Jyldyq mándegi infliatsiia 6,6 paiyzdy qurady», - dedi ol.
