Keshe telearnany terip qarap otyryp, Májilis depýtaty Baqytbek Smaǵuldyń bir usynysyn kózimiz shalyp qalyp, shaiymyzǵa shashalyp qaldyq. Sebebi, keshe ǵana ýlap-shýlap júrip, qarsylasqandardyń únin óshire otyryp, qurylǵan Eýraziialyq Ekonomikalyq odaqtyń ómirge kelgen kúni 29 mamyrdy «Eýraziialyq yqpaldastyq kúni» retinde Merekeler tizimine engizýdi surap otyr ǵoi depýtat.
Birinshiden, dál osy kúndi, qurylǵany keshe ǵana bolǵan, baiandylyǵy senimsiz, Elbasymyz úlken úmitpen odaqtyń qurylýyna bastamashy bolsa da, qazaq ekonomikasyn álsiretip kele jatqan EEO kúnin merekege ainaldyrýdy usynys jasaidy dep depýtattardan eshkim kútken joq. Dál qazir bul Odaqtan Reseiden basqa elderdiń bári ziian shegip jatqany anyq. Belorýssiianyń batyr prezidenti Lýkashenkonyń “Bundai ziiankes odaǵyńnyń keregi joq, shyǵamyn”-dep shala búlingeni keshe ǵana emes…
Ekinshiden, bundai ulttyq táýelsizdigimizge kúsh beretin emes, kúmán týdyra bastaǵan kúndi mereke etýdi basqa-basqa emes, ózi aqyn bolǵandyqtan janymyzǵa jaqyn tartatyn Baqytbek Smaǵul baýyrymyz jasaidy dep tipti, úsh uiyqtasaq, túsimizge kirgen joq…
Úshinshiden, Eýraziialyq Ekonomikalyq odaqtan talai jyl buryn qurylyp, buryn bir-birine bodan bolmaǵan teń (!) memleketterdiń qurylǵan kúnin osy elderdiń qaisysy alaqailap, merekege ainaldyrǵanyn estimeppin?!. Merekelemek túgili EýrOdaqtaǵy eń bedeldi el Ulybtritaniia odaqtan shyǵýǵa sheshim qabyldady. Úlgi alarlyq úrdis.
Tórtinshiden, endi el sengen, tili, dili qazaqy depýtatymyz osyndai usynys jasap otyrsa, onda erteń tili túgil tegin durys qazaqsha jaza almaityn bir depýtatymyz Keńes odaǵynyń qurylǵan kúnin, Keńestik Qyzyl Armiianyń kúni – 23 aqpandy, Komsomoldar kúni -29 qazandy (jaqyndap qalypty, beker aittym-aý deimin) merekeleýdi «qaita qalpyna keltire salaiyq, aqyr sol qyzyl imperiia tilimen sóilep júrmiz, Keńes odaǵy bolmaǵanda nemiz qaldy»-dep shyqpasyna kim kepil?
Biz, tipti, Tuńǵysh Prezident kúnin 23 jyldan soń, keshe ǵan engizgen joqpyz ba merekeler tiziimne… Eki jyl endi bolǵan Eýraziialyq ekonomikalyq odaq kúnin merekeleitindei janymyzǵa ne kórindi Baqytbek myrza!.. Eger sizge bireý osyndai usynys jasap, kóndirse, ondai «dosyńyz» bolsa, jaýdyń keregi joq sizge de, elge de…
«Baqsaq, baqa eken» degendei, bul qaidan shyqty desek, Abai.kz saitynda Nurgeldi inim “Baqytbek neni bylyqtyryp júr?”-dep, shyryldaǵandai, Aýyt Muqibek 18 qarashany «Ulttyq kóshi-qon» kúni etýdi surap kelip, ony Baqytbek Smaǵul myrza Úkimet basshysyna joldapty. Óte durys! Jasai berińiz, Baqytbek myrza! Aý, biraq Aýyttyń aitqanynan aýyt ketýdiń, aýyp ketýdiń ne keregi boldy? El ishinde ájeptáýir abyroiyńyz bar, bedelińiz bar depýtat, qalam ustaǵan qairatker emes pe edińiz?
Buǵan endi ne deimiz?
Budan keiin depýtattar saýal jasasa, qorqyp otyratyn boldyq…
Qazybek ISA
Qazaquni.kz
