Baqyt Sultanov Eýraziialyq ekonomikalyq komissiianyń Básekelestik jáne monopoliiaǵa qarsy retteý jónindegi alqasynyń múshesi bolyp taǵaiyndaldy, - dep habarlaidy "Ult aqparat" uiym saityna silteme jasap.
"Joǵary Eýraziialyq ekonomikalyq keńestiń biyl 6 qazandaǵy sheshimi boiynsha, Qazaqstan Respýblikasynan Eýraziialyq ekonomikalyq komissiia alqasynyń jańa múshesi (ministri) bolyp Baqyt Sultanov taǵaiyndaldy. Onyń quzyretine Eýraziialyq ekonomikalyq odaqtyń transshekaralyq naryqtaryndaǵy monopoliiaǵa qarsy retteý jáne básekelestik máseleleri enedi", - delingen habarlamada.
Eske salaiyq, 14 shildede Úkimettiń keńeitilgen otyrysynda Qasym-Jomart Toqaev Baqyt Sultanovqa, aýyl sharýashylyǵy ministri Erbol Qarashókeevke sógis jariialaǵan bolatyn. Tamyzda Sultanov premer-ministrdiń orynbasary - saýda jáne integratsiia ministri laýazymynan bosatyldy.
Baqyt Sultanov 1971 jyly Almaty qalasynda dúniege kelgen.
1994 jyly Qazaq ulttyq tehnikalyq ýniversitetin «Robototehnikalyq keshender jáne júieler» mamandyǵy boiynsha, 1995 jyly Qazaq memlekettik basqarý akademiiasyn «Biznes jáne menedjment» mamandyǵy boiynsha támamdaǵan. Injener-elektrik, ekonomist.
2003 jyldyń maýsymynan 2006 jyldyń aqpanyna deiin Qazaqstannyń ekonomika jáne biýdjettik josparlaý vitse-ministri bolǵan. Odan keiin respýblikanyń statistika agenttiginiń tóraǵasy bolyp jumys istegen. 2007 jylǵy qańtar-tamyz aralyǵynda qarjy vitse-ministri qyzmetin atqardy, al 2007 jylǵy 10 tamyzdan bastap eldiń ekonomika jáne biýdjettik josparlaý ministrligin basqarǵan.
2010 jyldan bastap Memleket basshysynyń Jarlyǵymen Qazaqstan Prezidentiniń kómekshisi bolyp taǵaiyndaldy. 2012 jyldyń 21 qańtarynda Nursultan Nazarbaev Baqyt Sultanovty Qazaqstan Prezidenti Ákimshiligi basshysynyń orynbasary qyzmetine taǵaiyndaý týraly Jarlyqqa qol qoidy. 2013 jyldyń qarasha aiynda ol qarjy ministri boldy.
Sultanov 2018 jyly 11 qyrkúiekten bastap Astana ákimi qyzmetin atqarǵan. 13 maýsymda ony osy qyzmette Altai Kólginov almastyrdy.
"Qurmet" ordenimen jáne eki medalmen marapattalǵan.
