Qazaqstanda otandyq eksporttaýshylarda qoldaýǵa baǵyttalǵan QAZTRADE eksporttyq akselerator baǵdarlamasy iske qosyldy, dep habarlaidy "Ult aqparat".
«Bárimiz álemniń búgingi qubylmaly bolmysyn baqylap otyrmyz. Álemdik óndiris tizbegi quldyrap, halyqaralyq saýdanyń qurylymy jáne kólemi ózgerýde. Dástúrli saýda negizderine jańa saýda sharttary áserin tigizip jatyr. Týyndaǵan daǵdarys, árine, biznesti júrgizýdi qiyndatady. Degenmen, básekelik artyqshylyq turǵysynan múmkindik týdyrady», - Saýda jáne integratsiia ministri Baqyt Sultanov dep jazdy ministr Facebook-tegi paraqshasynda.
Baqyt Sultanovtyń jazýynsha halyqaralyq saýdanyń qazirgi sharalary bizdiń eksporttaýshylarymyz úshin jańa múmkindikterge qol jetkizip, jańa naryqtarǵa esik ashyp, ónimderdi satýǵa qolaily jaǵdai týyndaǵan. Búgin de Qazaqstan eksportqa baǵyttalǵan kásiporyndardyń, eń aldymen shaǵyn jáne orta biznes ókilderiniń turaqty damýy - jumys oryndaryn saqtaýdyń jáne ulttyq ekonomikanyń qarqynyn jedeldetýdiń kepili ekenin túsinedi. Sondyqtan Saýda jáne integratsiia ministrligi qazaqstandyq eksportty qoldaý men damytýǵa erekshe nazar aýdarmaq.
«Qazir biz halyqaralyq saýdadaǵy buryn-sońdy bolmaǵan qiynshylyqtardyń kýásimiz. Degenmen, tipti eń qiyn kezeńderde eshqashan toqtamaǵan eksporttyq qyzmet qazir de toqtamaidy. Bizdiń ónimderimiz túrli elderde áli de úlken suranysqa ie. Pandemiia báseńdep, ekonomika jańa leppen jumys isteitini anyq! Sondyqtan biznes óziniń taýarlaryn syrtqy naryqqa jetkizýge daiyn bolýy kerek. Shetel naryqtyrynda saýdany keńeitýge bel býǵan kásipkerlerge qoldaý kórsetý maqsatymen biz QAZTRADE eksporttyq akselerator baǵdarlamasyn iske qostyq. Baǵdarlamanyń maqsaty – eksporttyq saýda jasaýǵa múddeli kásipkerlerge qoldaý sharalaryn jinaqtaidy. Kásiporynnyń jáne onyń ónimderiniń áleýetin taldaýdan bastap, naryqty tańdaýǵa, satyp alýshyny tabýǵa, marketing naýqanyn júrgizýge jáne eksportqa qajetti qujattardy ázirleýge járdemdesýge deiin qoldaý kórsetedi. Jalpy áleýetti eksporttaýshy qyzmetin tolyq negizde basynan soǵyna deiin súiemeldeý: satýǵa degen nietten bastap, satyp alýshyǵa partiiany jiberýge deiin súiemeldeidi», - dep jazady Baqyt Sultanov.
Ministr baǵdarlamany tamaq ónerkásibinen bastaýǵa sheshim qabyldanǵanyn jetkizdi.
«Árine, eksporttaýshyny qoldai otyryp, biz onyń ónimderiniń ishki naryqtaǵy suranysyn da eskeremiz. Memleket úshin eksport qanshalyqty mańyzdy bolsa da, birinshi mindetimiz - eń aldymen ishki suranysty qamtamasyz etý. Osy oraida, tamaq ónerkásibinde jumys isteitin barlyq kásipkerdi export.gov.kz portalyna ótinim jiberý arqyly eksporttyq baǵytta deńgeilerin synap kórýge shaqyramyn. Mańyzdy jait – QAZTRADE akseleratory biznes ókilderi úshin aqysyz túrde júzege asyrylady. Sonymen qatar, barlyǵyńyzdy qazaqstandyq eksporttaýshylar úshin bir tereze ortalyǵy - export.gov.kz portalyna shaqyramyn! Munda kásipkerlerdiń memlekettik uiymdarda alatyn qyzmet túrleri (keńes alý, saqtandyrý jáne t.b.) shoǵyrlanǵan. Endi portaldyń qyzmetterin paidalaný jáne jelide onlain qyzmetterge tapsyrys berý qoljetimdi», - dep túidi ministr.
